Саха Өрөспүүбүлүкэтигэр профсойуус үлэһиттэрин декадатын чэрчитинэн сэтинньи 24 күнүгэр түмүктүүр үс сүрүн тэрээһини ыытыахтара.
edersaas.ru
Сарсыарда Бырабыыталыстыба 2 №-дээх дьиэтигэр өрөспүүбүлүкэ профсойуустарын федерациятын сэбиэтин мунньаҕа буолуоҕа. Мунньахха профсойуус салаа кэмитиэттэриттэн талыллыбыт сэбиэт чилиэннэрэ кыттыахтара. Кинилэр быраабы араҥаччылааһын, социальнай бииргэ үлэлээһин, үлэ харыстабылын, тэрийэр үлэ уонна каадыр боппуруостарын дьүүллэһиэхтэрэ.
Онтон 11 чаастан Бырабыыталыстыба дьиэтин 1 №-дээх дьиэтигэр профсойуус актыыба өрөспүүбүлүкэ Ил Дархана Егор Борисовы кытары үгэс буолбут көрсүһүүтэ «ыйытыы-хоруй» көрүҥүнэн тэриллиэҕэ. Көрсүһүү кыттыылаахтара үлэ кэлэктииптэрэ туруорар кыһалҕаларын, сытыы боппуруостарын таарыйыахтара.
Декада өрөспүүбүлүкэ профсойууһун актыыба кыттыылаах үөрүүлээх мунньаҕынан түмүктэниэҕэ. Саха тыйаатырын дьиэтигэр 15.00 ч. буолар мунньахха өрөспүүбүлүкэ салалтатын бэрэстэбиитэллэрэ, норуот дьокутааттара, социальнай хайысхаҕа бииргэ үлэлэһэр дьон кыттыахтара.
Надежда ЕГОРОВА, «Саха сирэ» хаһыат, edersaas.ru