Арктикатааҕы култуура уонна искусство институтун ректора Саргылаана Игнатьева Дьокуускай куорат Автодорожнай уокуругар баар “Прометейчик” оҕо саадын айар талааннаах оҕолорун сайыннарыыга «ARS – Прометейчик» оҕо айымньытын академията» диэн ааттаах анал бөлөх тэрийэр туһунан уһуйаан сэбиэдиссэйин Мария Прокопьеваны кытта дуогабарга илии баттаста.
Үөрүүлээх дьаһалга саха искусствотын биллиилээх диэйэтэллэрэ Айталина Адамова, Кирилл Герасимов, Мария Рахлеева, Розалия Бурцева, Туйаара Шапошникова итиэннэ эдэр преподавателлар Раджана уонна Михаил Погодаевтар кэлэннэр төрөппүттэри уонна оҕолору кытта көрүстүлэр.
Айар үлэһиттэри бэлэмниир үрдүк үөрэх кыһата сотору кэминэн үөрэнэ кэлиэхтээх көлүөнэлэргэ улахан болҕомтону уурар, үөрэтии-такайыы тиһигэ быстыбакка салҕанарын ситиһэр. Ол курдук, Саргылаана Семеновна этэринэн, Арктикатааҕы институт Музыка үрдүкү оскуолатын, Хореографическай колледжы, Дьокуускай куорат орто оскуолаларын уонна тыа сиригэр баар Оҕо айымньытын дьиэлэрин кытта ыкса ылсан үлэлиир, онуоха өрөспүүбүлүкэҕэ киэҥник тэнийбит “Муусука — барыбытыгар”, “Бары уруһуйдуубут”, “АРТ-муҥха” бырайыактар туһалыыллар эбит. Биллэрин курдук, аан дойдуга оҕону искусство, култуура эйгэтигэр кырачаан сааһыттан тардар үлэ күүскэ ыытыллар. Холобур, Японияҕа оҕону скрипкаҕа оонньуурга 2-3 сааһыттан үөрэтэллэр. Дьэ ол иһин институт бастыҥ педагогтара анал бырагыраама суруйан, сэтинньи ыйтан “Прометейчик” уһуйааҥҥа оҕолору дьарыктыахтара.
Тоҕо эһиги бу уһуйааны талан ыллыгыт диэн ыйытыыга С.С. Игнатьева маннык хоруйдаата: “Бу кыбартаал дьоҕус сиргэ чөкө турарынан, бырайыага тупсаҕайынан итиэннэ эдэр ыаллар манна таптаан олохсуйалларынан биһигини интэриэһиргэттэ”.
Бу уһуйаан аһыллыаҕыттан, оҕо талаанын уһугуннарыыга дьаныһан үлэлиир, араас сонун суолу-ииһи көрдөнөр. Сэбиэдиссэй Мария Прокопьева төрөппүттэргэ туһаайан эттэ: “Сүрүн сирдэтэр методикабыт – “Төрүөҕүттэн – оскуолаҕа диэри” диэн ФГОС-ка киирбит, киэҥник туттуллар бырагыраама, ол эрээри, оҕолорго билиини тиэрдэр ньымаларбыт уратылаахтар. Кинилэр аныгы оҕо толкуйдуур, быһаарар, чинчийэр, айар дьоҕуругар туһуланаллар. Биһиги Ил Дархаммыт Айсен Николаев өреспүүбүлүкэбит кэлэр кэскилэ экэниэмикэ үгэскэ кубулуйбут эйгэлэрин сэргэ, киһи өйүн, мындырын сайыннарар креативнай экэниэмикэни кытта ситимнээх диэн эппитэ. Оҕо уһуйааннарын үлэһиттэрэ даҕаны итинник сорук турарын умнуо суохтаахпыт”.
“Прометейчик” иитиллээччилэрэ хайы-үйэ робототехниканан дьарыктаналлар, араас конструктордарынан үлэлииллэр, 3-D принтэри, көмпүүтэрдэри тутталлар, “Мин – инженербин” куонкуруска кытталлар. Аны билигин кинилэри вокалга, норуот үҥкүүтүгэр, уруһуйга Култуура уонна искусство институтун педагогтара уонна устудьуоннара уһуйуохтара, дэгиттэр сайдыылаах дьон буолалларыгар көмөлөһүөхтэрэ.
Нобель бириэмийэтин лауреата, экэнэмиис Джеймс Хекман: “Оскуола иннинэ саастаах оҕолору иитиигэ уонна үөрэтиигэ туттуллубут үп кэнэҕэһин экэниэмикэҕэ сүрдээх улахан барыһы киллэрэр итиэннэ уопсастыбаҕа баай-дуол өттүнэн тэҥэ суох буолууну, дьадайыыны туоратыыга күүстээх көдьүүһү биэрэр”, — диэн этэн турар. Оччотугар хас биирдии култуура үлэһитэ оҕо саас дьоллоох буоларыгар бэйэтин сэмэй кылаатын киллэрдэҕинэ, Сахабыт сирэ барҕара сайдыа этэ буоллаҕа.
edersaas.ru саайтка анаан Аита ШАПОШНИКОВА.