Сыананы имигэстик ыаратары урбаанньыттар наһаа сатыыллар. Ордук наадыйыы улааттаҕына.
Прокопий БУБЯКИН, Еdersaas.ru
Ити иһин таксистары мөҕөр табыллыбат: судаарыстыба бэлэмиттэн тэйэн, айахтарын бэйэлэрэ булунар хорсун дьон. Бүгүҥҥү санаа үллэстиим кинилэри букатын кэриэтэ таарыйбат.
Ааспыт өрөбүллэргэ Алдаҥҥа улахан ыһыаҕы ыстылар. Нерюнгригэ олорор аймахтарым, саха ааттаах дьон, оччо чугас Олоҥхо ыһыаҕа буоларыгар, дьиэ кэргэнинэн барарга санаммыттар. Хайдах сылдьыбыттарын батсаапка «Аймахтар» бөлөххө суруйбуттарын ааҕан, арааһы эргитэ санаатым.
“Индрайвердар” уонна таксистар Нерюнгри — Алдан (270 килэмиэтир) икки ардыгар урут 500-1000 солк ылар эбиттэр. Ыһыахха айаннааччы элбээбитин билэн, таксистар сыананы 2000-2500 гына көтөҕө охсубуттар.
Дьиэ кэргэнинэн бара-кэлэ айанныылларыгар сыана абытайа бэрт буолбут. Толкуйга түһэн олордохторуна, ийэлэрэ «пуойас!» диэн саҥа аллайбыт. Ыйыталаспыттара, пуойаһынан бырайыас 500 солк. эрэ буолан үөрдүбүт. Массыынатааҕар бытаан да буоллар, лаппа чэпчэки сыанаҕа баран ыһыахтаан төннүбүттэр…
Пуойас кэлэриттэн сахалар төһө да куттаммыппыт иһин, үбэ кырыымчык саха эдэр ыала тимир суолу туһаммыт буолбат дуо? Арай, тимир суол Мэҥэнэн, Чурапчынан, Тааттанан, Томпонон Өймөкөөҥҥө лиһигирээн тиийбит буоллун? Бу улуустар, бу эргин улуустар олохтоохторо дэлэлээх абыраммыт буолуо этилэр дуо!.. Киһиэхэ кыра наада. Киһи судаарыстыбаттан, дьиҥэр, элбэҕи көрдөөбөт.
Ити эрээри, тимир суол кэлэриттэн куттанарбыт эмиэ оруннаах. Пуойаһы наркотигы кытта сибээстиибит. Онтубут арыый сыысхаллаах эбит, быһыыта. Сурах хоту иһиттэххэ, пуойаһа да суох, наркотик атын суол булан, Дьокуускайы халааннаан эрэр эбит.
Биир доҕорум: “Проня, эн куорат түүҥҥү олоҕун билбэт эбиккин. Түүн кулууптарга көрөр ииримтийбит дьонуҥ сороҕо — төрүт арыгы испэтэх дьон буолаллар…” – диэн кэпсээбититтэн этим саласпыта.
Кистэлэҥ атыылааһын ситимэ дэлэйбит: Qiwi электроннай кумааһынньыгынан соҕуруу харчы ыыталлар, өтөр буолан баран суотабайдарыгар Москубатааҕы нүөмэртэн Дьокуускайга чопчу ханан сытарын ыйар СМС кэлэр үһү. Бүттэ. Иэдээннээх тиһик номнуо толкуйдаммыт! Атыылааччы сирэйин да көрбөккүн, куолаһын да истибэккин.
Полиция наркобароннары (биир да дойдуга кыайтара илик эрэттэри) хам баттыырын кэтэһэн олорбокко, дьон-сэргэ бэйэтэ охсуһан саҕалыыр кэмэ кэлбит. Төрөппүттэр наркотигы утары оҕолору эрдэттэн сэрэтэр дьиэ иһигэр улахан үлэни ыытыахтаахпыт. Сиэр-майгы, үөрэх-той чааһыгар иитиилээх эрэ оҕо итинник иэдээҥҥэ киирэн биэримиэн сөп курдук.
Тыва Өрөспүүбүлүкэтин уопута да көрдөрөрүнэн, наркотик кэлэрэ элбээн эрэ иһиэҕэ. Охсуһардыы олохтоохтук бэлэмнэниэххэ.
Прокопий Бубякин, «Саха сирэ» хаһыат уонна Еdersaas.ru саайт сүрүн эрэдээктэрэ.