«Пушкин диктанын» суруйарга холонуум (репортаж)

Бөлөххө киир:

    Бэс ыйын 6 күнүгэр Арассыыйа үрдүнэн А.С. Пушкин төрөөбүт күнүн кытта Нуучча тылын уонна литературатын күнэ бэлиэтэнэллэр. Ол курдук, быйыл бэһис сылын дойдубут үгүс куораттарыгар «Пушкинский диктант» диэн ааттаах уопсастыбаннай аахсыйа ыытылынна. Дьокуускай куоракка  аахсыйаҕа 2013 сылтан саҕалаан оҕолор эрэ кыттар буоллахтарына, быйыл улахан дьоҥҥо анаан туспа күрэс тэрилиннэ.


Афишаҕа биллэрбиттэринэн, диктант Үөрэҕи сайыннарар уонна идэни үрдэтэр институкка буолуохтааҕа. Бастакы этээскэ киирээти кытары, тугу да ыйыта иликпинэ, өтө көрбүт курдук, 218 хоско ыыппыттара. Хос иһигэр үс киһи олороро. Дьон аҕыйаҕын дьиксинэ санаабытым эрээри, кылгас кэм иһигэр уонча буола охсубуппут. Кыттааччылар кэпсэтиилэриттэн истибитим, күнүс үс чаастан өссө иккис бөлөх мустуохтаах үһү. Тэрийээччилэр кэлэ иликтэрэ, остуолтан остуолга суруйтарар испииһэк көһөрө. Ааппытын-суолбутун, төлөппүөммүт нүөмэрин уонна электроннай почтабыт аадырыһын суруйбуппут.

Диктант хойутаабакка, чопчу ыйыллыбыт кэмигэр, уон чаастан саҕаламмыта. Олорооччулартан үгүстэрэ оскуола учууталлара, кинилэргэ анаан уустук соҕус, оттон «тыл үөрэҕим  суох» диэбит дьоҥҥо чэпчэтиилээх сорудахтары түҥэппиттэрэ.

Диктант диэни иһиттэҕинэ, үгүс киһи аахпыттан истэн суруйууну саныыра буолуо, ол эрээри онтон ураты, сорудах толоруулаах диктант баар эбит. Хас да илиискэ эҥин-араас таһымнаах сорудахтар – «тиийбэт буукубата туруор», «этиини ситэр» диэннэртэн саҕалаан, кылгас өйтөн суруйууга диэри. Киһи үчүгэйдик кыттарын туһугар Пушкин айымньыларын эрэ буолбакка, кини туһунан эргиччи билиилээх буолара булгуччулаах. Пушкин мэтириэттэрин уруһуйдаабыт худуоһунньуктары, кини аатын бэйэлэрин айымньыларыгар үйэтиппит суруйааччылары, быһыытын-таһаатын бронзаҕа куппут уустары – барыларын билиэхтээх.

Сорудахтары толорууга 45 мүнүүтэ биэрбиттэрэ. Хос иһэ уу-чуумпу буолбута, илиис хачыгырааһына уонна уруучука сурдурҕаччы суруйар тыаһа эрэ иһиллэрэ. Өр кэмҥэ ханнык да күрэстэргэ кыттыбатах буоламмын, бастаан утаа уолуйбутум, сорох ыйытыктары ааҕа-ааҕа, тугу да билбэт эбиппин диэн долгуйбутум. Санаабар, сурук быһыытынан диктант буолуохтаах курдуга. Сорудахтары биэрэ иликтэринэ дьон Пушкин айымньыларын өйдөрүгэр ааҕа, өйдүү олороллорун улахаҥҥа уурбатаҕым. Эрдэ кэлэн түннүк нөҥүө саҕаланан эрэр ардаҕы кэтии олоруом оннугар, бэлэмнэнэ түспүтүм ордук буолуо этэ диэн толкуйдаан ылбытым. Төһө да билэрим аҕыйаҕын иһин, баарбынан эппиэттэһэн баран, илииспин туттараат, тахсыбытым. Аҥаарбыт эрдэ бүтэрбиттэрэ, өссө биир аҥаарбыт салгыы толоро хаалбыттара. Күрэспит түмүгэ от ыйын 1 күнүгэр биллиэхтээх уонна хас биирдии киһи кыттыбытын туоһулуур сэртипикээти электроннай почтатыгар тутуохтаах.

Бэйэни тургутан көрөргө, саҥаны билэргэ маннык курдук тэрээһиннэр олус туһалаахтар эбит. Бүтүн Арассыыйа үрдүнэн ыытыллар аахсыйа А.С. Пушкин аатын өйдүү-саныы сылдьарга, нуучча тылын уонна литературатын үөрэтиигэ улахан көмө буолар. Кэлиҥҥи сылларга кыттар дьон ахсаана элбээн иһиэ диэн бигэ эрэллээх хаалабын.

Света ИВАНОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0