close
Путбуол, Шекспир уонна… сэлээппэ
Биэтэс Билээхэп - Олох-дьаһах

Путбуол, Шекспир уонна… сэлээппэ

Ааспыт нэдиэлэ биир куйаас күнүгэр эмээхсиним ыһыахха кэтэр таҥаспытын бэрийээччи буолла. Халадаайын, кэһиэччигин, мин хомуһуолбун сайылыгар таһаартаран салгылатта, тэбээтэ. Ол сылдьан: “Оҕонньоор, сэлээппэҥ көстүбэт дии. Ханна гынныҥ буолла?” – диэн оргууй унаарытта. “Уурбут киһи уурбут сиргиттэн сулбу тардан ыллаҕыҥ дии”, — диэн утары баайсыым хардата суох хаалла.

Сарсыныгар сорук оҥостон куораттааҕы дьиэбитигэр киирэн ыскааппытын чүүччэйдибит да, булбатыбыт. Айаҕалыы сатаан болкуоҥҥа турар таҥастары сыымайдаатыбыт. Хайа үөдэн түгэҕэр түстэҕэ буолла. Бэйэтэ да эргэрэн, быдан үйэҕэ быһыытын-моһуонун сүтэрэн, киһи эрэ улаханнык дураһыйбат мала этэ…

Онон бүгүн, дьиэтээҕи сэбиэт саҥа сэлээппэ атыылаһарга диэн уурааҕын толоро, эмиэ куораттыыр буоллум. Итии оптуобуска үлтү сахсыллан, онно эбии аттыбар кэккэлэһэ олорбут оҕолор айан саҕаланыаҕыттан бүтүөр диэри алларастаһан тахсаннар, автовокзалга киҥим-хааным дэлби холлубут киһи тиийдим. Эмээхсиним ырыынактары өҥөйөөр диэбитэ эрээри, эмиэ тыын-быар ыгыллар итии оптуобуһугар үтүрүһэрбин-анньыһарбын саныахпын да саллан, бастаан чугастааҕы маҕаһыыннары кэрийэргэ сананным. Кыратык тэпсэҥмэхтии түһээт, санаабар “Илин Эҥэр” диэки салаллыах курдук буолан иһэн, Сэргэх Сэргэйдиин ыы муннубутунан анньыһа түстүбүт. Биир түөлбэҕэ үөскээбит үөлээннээҕим куоракка олохсуйбута хаһыс да сыла. Хам-түм, үксүн сааһын, күһүнүн, куоракка буолар тэрээһиннэргэ көрсөн сэлэһэн ааһааччыбыт. Үөрбүтүн биллэрдэҕэ буолан, “О-о, Биэ-этэс!” – диэн ыарахан баппаҕайынан санныга тап гына оҕуста. Табаарыһым барахсан, төһө да улахан тардыас буоллар, урукку үгэһинэн, эмискэ-эмискэ төлүтэ биэртэлээн үгүһү-элбэҕи кэпсээн бөтүгүрэттэ.

Уонна, субу эрэ өйдөөбүттүү, чэрдээх ытыһын илиибиттэн араарбакка эрэ, «Арассыыйаҕа ыытыллар путбуолга аан дойду чөмпүйэнээтигэр кимнээх кыайыахтарай диигин, уксуох эрэ» диэтэ. Күн ­уотуттан өҥө-дьүһүнэ болоорбут бейсболкатын кэтит куондурун анныттан тэбэнэттээҕинэн көрөн турда.

Онуоха, туох да кэтэх санаата суох, «Үйэбэр дьону соролоспотох баҕайым», — диэн чап гыммыппын кулгааҕым эрэ истэн хаалла. Бадаҕа, маарыын оптуобуска кыйаханыым «адаар муоһа» испин кэйиэлээтэ быһыылааҕа. Киһим хомойбута сирэйигэр билиннэ. «О-онньу-уу, о-онньу-уу ээ, а-атаас», — диэмэхтээтэ. Түөспэр кэмсинэр санаам тулаайахсыйда…

Күн киэһэриитэ даачабар Сэргэйбинээн күө-дьаа буолан тиийдибит. Эмээхсиним ыйытардыы көрөн ылбытыгар, «Олох диэн — оонньуу», — диэн хардардым. «С-сэспи-ир, Сэспи-ир!», — атаһым иэдэһигэр олорбут кумаары ытыһын көхсүнэн охсунна. Уонна «Кини — Испания, мин — ньиэ­мэспин», — диэн мичээрдээн малаарыйда.

Хаартыскалар: интэриниэттэн

#бүгүн: 1
1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

17 + восемь =