Путин 11-с губернаторын ууратта

Бөлөххө киир:
  1. Дойду президенэ Владимир Путин балаҕан ыйын 25 күнүгэр Самарскай уобалас аҕа баһылыга Николай Меркушкины ууратан, губернатор эбээһинэһин толорооччунан олохтоох бэлиитиги Дмитрий Азаровы анаабыта. Бу иннинэ Владимир Путин алтынньы 10 күнүгэр диэри 10 губернаторы ууратыахтаах диэн биллэр-көстөр экспэртэр, информационнай агентстволар сылыктаабыттара.

edersaas.ru

Ол эрээри экспертэр билгэлээбит болдьохторо ааста. Алтынньы 12 күнүгэр Псковскай уобалас губернатора Андрей Турчак болдьоҕо бүтэ илигинэ отставкаҕа барда.

Турчактан ураты өссө ханнык регионнар баһылыктара суох хаалбыттарай?

Ивановскай уобалас губернатора Павел Коньков Турчак эрэ иннигэр кириэһилэтин босхолообута. Билигин кини оннугар губернатор эбээһинэһин толорооччунан Станислав Воскресенскай үлэлии олорор.

Омскай уобалас губернатора Виктор Назаров эмиэ болдьоҕун иннинэ дуоһунаһыттан ууратылынна. Кремль пресс-сулууспатын сайта суруйарынан, Назаров баҕа өттүнэн үлэтититтэн уурайбыт. Билигин кинини быстах кэмҥэ Александр Бураков солбуйда.

— Ааспыт бээтинсэҕэ Владимир Путин Новосибирскай уобалас губернаторын Владимир Городецкайы уураппыта.

— Оттон Орловскай уобалас губернатора Вадим Потомскайы РФ президенин Киин федеральнай уокуругун боломуочуйалаах бэрэстэбиитэлин солбуйааччытынан анаабыттара.

Красноярскай кыраай губернатора Виктор Толоконскай эмиэ уурайан, кини оннугар эбээһинэһи толорооччунан Александр Усс ананна.

Дагестан баһылыга Рамазан Абдулатипов балаҕан ыйын 27 күнүгэр «Говорит Москва» радиостанцияҕа отставкаҕа барарын туһунан эппитэ. Владимир Путин кини сайабылыанньатыгар илии баттаан, быыбарга диэри эбээһинэһи толорооччунан «Биир Ньыгыл Россия» фракцият бэрэссэдээтэлэ Владимир Васильев анаммыта.

— Балаҕан ыйын 28 күнүгэр Ненецкэй автономнай уокурук губернатора Игорь Кошин кириэһилэтиттэн «көппүтэ».

Нижегородскай уобалас губернатора Валерий Шанцев баҕа өттүнэн үлэтиттэн уурайарын туһунан иһитиннэрбитэ. Билигин кини миэстэтигэр бакаа Глеб Никитин олордо.

— Приморскай кыраай эмиэ баһылыга суох олорор. Владимир Путин Владимир Миклушевскайы алтынньы саҥата уураппыта.

Инникитин өссө ханнык регионнарга уларыйыы тахсыай? Билиҥиитэ туох да диэн билгэлиир, этэр кыахпыт суох. Биллэн турар, туруктаах олохтоох регионнарга Москуба орооһуо суоҕа.

Анивера Акимова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0