Бүгүн Кириэмилтэн РФ президенэ Владимир Путин Москва бириэмэтинэн 12 чааска, биһиэнинэн 18:00 чааска, 15-с төгүлүн быһа эфиргэ таҕыста. Былаһааккаҕа уопсастыбаннай түмсүүлэр, регионнар бэрэстэбиитэллэрэ, барыта 200 киһи мустан олорор.
Президент пресс-сэкирэтээрэ Дмитрий Песков бэлиэтииринэн, быйыл да социальнай эйгэҕэ үгүс боппуруос киирбит. Ол курдук, ордук ОДьКХ, хамнас, социальнай көмө туһунан, о.д.а. ыйытыылар инники күөҥҥэ сылдьаллар. Ол оннугар Сирия, сэрии, тас дойдулары кытары сыһыан курдук сытыы боппуруостар улаханнык таарыйыллыбатахтар. Бүгүн 5 чааска диэри Владимир Путиҥҥа сибээс бары көрүҥүнэн 2 мөлүйүөн кэриҥэ ыйытыы киирбит.
Быһа эфир хас чаас салҕанан барыаҕа биллибэт. Даҕатан эттэххэ, Владимир Владимирович саамай уһуннук 2013 с. быһа эфиргэ олорбута. Ити сыл 5 чаас кэриҥэ нэһилиэнньэ ыйытыытыгар хоруйдаабыта. Оттон былырыын быһа эфир 3,5 чаас буолбута.
Онон быһа эфир кэмигэр да боппуруостаргытын ыытыаххытын сөп. Биэрии “Бастакы”, “Россия-1”, “Россия-24” ханаалларынан, “Маяк”, “Вести”, “Россия радиота” радиостанцияларынан бара турар.
Быһа эфир төлөпүөнэ: 8-800-200-40-40, СМС: 0-40-40.
Аграфена КУЗЬМИНА, «Саха сирэ» хаһыат, edersaas.ru