Путин быыбарга кыттарын «ГАЗ» собуотугар иһитиннэрдэ

Бөлөххө киир:

 Улахан салайааччылар быыбарга кыттары хаһан иһитиннэрэллэрэ суолталаах тэрээһин, маны кистэлэҥҥэ туталлар.

Прокопий БУБЯКИН, https://edersaas.ru

Үгэс курдук, кинилэр маннык сири эрдэттэн кичэйэн толкуйдууллар уонна бэлэмнииллэр. Уонна, буоларын курдук, тиһэҕэр диэри кистэлэҥҥэ туталлар.

Дойду баһылыга Владимир Путин бэҕэһээ, ахсынньы 6 күнүгэр үлэтинэн Аллараа Новгородка  бара сырытта. Манна, былаан быһыытынан, кини аатырбыт Горькайдааҕы массыына собуотугар сырытта. Собуот 85 сылынан сибээстээн, сыах иһигэр «ГАЗ» бэтэрээннэрин уонна үлэһиттэрин эҕэрдэлээн тыл эттэ.

Тыл этиитин бүтүүтэ, соһуччу: «Мантан ордук сири уонна кэми талар уустук, эһиги иннигитигэр мин бэрэсидьиэн быыбарыгар кыттарбын иһитиннэрэбин!» — диэтэ. Тула ытыс тыаһа хабылла түстэ. Политическай шоу табылынна диэххэ сөп. Президент ханнык миэстэҕэ эппитинэн, кини инники бэрэсидьиэнниир программата тутулуктаах буолар.

ЭКСПЕРТ САНААТА

Павел Ксенофонтов, «Сахатранснефтегаз» АУо Гаас магистральнай ситимнэрин көрөр-истэр саламтатын кылаабынай инженерэ:

— Путин быыбарга кыттарын этэр сир быһыытынан, «ГАЗ» собуотун талбытын истэн, биһиги инженердэр, үөрдүбүт. Үчүгэй бэлиэ быһыытынан ылынныбыт. Дойдубут салгыы технологическай, инженернэй сайдыытын мэктиэтин быһыытынан сыаналаатыбыт. Маны таһынан, мин гаас эйгэтин үлэһитэ буоларым быһыытынан, «ГАЗ» диэн ааттаах собуоту уруккуттан уруурҕуу көрөбүн. Кэлин саха тылынан дьарыктанан эрэбин, ол иһин хас биирдии тылга болҕомто уурабын.

Прокопий БУБЯКИН, https://edersaas.ru

Хаартыска — РИА «Новости»

ЫСПЫРААПКА

Миэстэни талыы

Владимир Путин кулун тутардааҕы быыбарга кыттарын норуот кэтэһэр уонна ханна иһитиннэриэн таайа сатыыр этэ. Суруналыыстар Россия Төрүт Сокуонун күнүгэр (ахсынньы 12 күнүгэр) эбэтэр бэйэтин улахан пресс-конференциятыгар (ахсынньы 14 күнүгэр) этиэҕэ диэн сабаҕалыырбыт. Тоҕо диэтэххэ, сокуон быһыытынан, быыбар буолуо 100 хонук иннинэ иһиллиэхтээх. Бу болдьох тиһэх күнэ ахсынньы 17 күнүгэр түбэһэр.

+1
0
+1
0
+1
0
+1
0
+1
0
+1
0
+1
0