Путин Саха сиригэр халаантан эмсэҕэлээбиттэргэ харчыны тиэрдиини ыксатта
Владимир Путин бырабыыталыстыба бэрэссэдээтэлэ Дмитрий Медведевкэ Саха сиригэр халаантан эмсэҕэлээбиттэргэ харчы тиэрдиитин түргэтэтэргэ сорудахтаата. Бырабыыталыстыба чилиэннэрин кытта мунньахха «Ыксаллаах быһыы-майгы содулун туоратар фонда үбүттэн Саха сиригэр харчы суһаллык барыан наада» — диэтэ.
Регионнарга халаан содулун туоратыыга туох үлэ бара турарын туһунан ыксаллаах быһыы-майгы миниистирэ Евгений Зиничев дакылааттаата. Бүгүҥҥү күҥҥэ Арассыыйа 9 региона халаан кыһалҕалаах. Ордук ыарахан балаһыанньа Забайкальскай кыраайга үөскүүр. Дакылааты истэн баран, Путин маннык диэтэ: «Забайкальскай кыраай, кырдьык, элбэх кыһалҕалаах. Саха сирэ үп-харчы ыытылларыгар сөптөөх ирдэбили ыыппыта, харчы билигин да бара илик«.
Үп-харчы миниистирэ Антона Силуанов этэринэн, федеральнай таһымнаах ыксаллаах быһыыга-майгыга сөп түбэспэт этиилэр киирбиттэр. «Билигин өрөспүүбүлүкэни кытта саҥа этиилэри оҥордубут, ситэрдибит, ыксаллаах быһыы-майгы министиэристибэтигэр биэрдибит. Резервнэй фондаҕа харчы баар«, — диир кини.
Бэрэсидьиэн Дмитрий Медведевкэ Саха сиригэр харчы ыытыытын боппуруоһун хонтуруоллуурга тоһоҕолоон эттэ.
«Саха сирэ» хаһыат, edersaas.ru