Ахсынньы 14 күнүгэр РФ бэрэсидьиэнэ Владимир Путин үгэскэ кубулуйбут улахан пресс-кэмпириэнсийэтэ буолуоҕа. Владимир Владимирович бу маннык тэрээһини бэрэсидьиэннии кэлиэҕиттэн, 2001 сылтан саҕалаан ыытар.
edersaas.ru
Бу тэрээһин бэрэсидьиэн ыытар улахан тэрээһиннэриттэн биирдэстэрэ. Пресс-кэмпириэнсийэҕэ аҥаардас Россия регионнарыттан эрэ буолбакка, тас дойдулар суруналыыстара эмиэ кытталлар. Бу нэдиэлэттэн саҕалаан ахсынньы 1 күнүгэр диэри суруналыыстар аккредитацияҕа докумуоннарын туттараллар.
Үгэс быһыытынан, көрсүһүү 3-4 чаас устата барааччы. Владимир Владимирович суруналыыстары кытары саамай уһуннук 4 чаас 40 мүнүүтэ устата 2008 сыллаахха кэпсэтэн турар. Маннык хартыына 2012 с. эмиэ хатыламмыта.
Оттон былырыын пресс-кэмпириэнсийэ 3 чаас 50 мүнүүтэ устата барбыта. Бэрэсидьиэн барыта 67 боппуруоска хоруйдаабыта. 1437 суруналыыс кыттыыны ылбыта. Өскөтүн кэлиҥҥи сылларга пресс-кэмпириэнсийэ, үгэс курдук, чэппиэргэ ыытыллар эбит буоллаҕына, былырыын Турцияҕа Россия посола өлөрүллэн, бээтинсэҕэ көһөрүллүбүтэ.
Кэлиҥҥи үс сылга пресс-кэмпириэнсийэҕэ тас дойдулары кытары сыһыан, чуолаан, Украина, АХШ, Турция, Сирия тустарынан, арҕааҥҥы дойдулар Россияҕа биллэрбит хааччахтара, олохтоох оҥорон таһаарыынан хааччыллыыбыт сүрүн миэстэҕэ турбуттара. Уонна, хайа, регионнар суруналыыстара түгэни мүччү туппакка, бэйэлэрин дойдуларыгар туох кыһалҕа баарын бэрэсидьиэҥҥэ быһаччы тириэрдэ сатыыллар. Онон суруктарын-бичиктэрин эрдэттэн бэлэмнээн, ох курдук оҥостон, кустук курдук куоһанан кэлээччилэр.
Быйылгы пресс-кэмпириэнсийэ туох уратылаах буолуоҕай? Билэргит курдук, РФ бэрэсидьиэнин быыбара эһиил кулун тутарга ыытыллара былааннанан турар. Онон Владимир Путин бу болдьоҕор бүтэһик пресс-кэмпириэнсийэтэ. Билигин кини быыбарга кыттарын-кыттыбатын чопчу этэ илик. Бу пресс-кэмпириэнсийэҕэ быктарыан сөбүн экспердэр сабаҕалыыллар. Тоҕо диэтэргин, сокуон быһыытынан, быыбарга кыттар дьон кандидатуралара 100 күн иннинэ биллиэхтээх. Бу иннинэ Федерация Сэбиэтэ Россия бэрэсидьиэнин быыбара ыытылларын туһунан биллэриэхтээх. Быһа холуйан, бу даата ахсынньы 7-17 күннэригэр түбэһэр. Онон Владимир Путин улахан пресс-кэмпириэнсийэтин быыбарга кыттарын-кыттыбатын иһитиннэрэр былаһаакка оҥостуон сөп.
Пресс-кэмпириэнсийэ Дьокуускай бириэмэтинэн киэһэ 18 чаастан саҕаланыаҕа. Биэриини “Россия”, “Россия-24”, “Бастакы ханаал” уонна радиостанциялар нөҥүө быһа эфиргэ көрдөрүөхтэрэ, иһитиннэриэхтэрэ.
Аграфена КУЗЬМИНА, «Саха сирэ» хаһыат, edersaas.ru