СӨ Айылҕа харыстабылын министиэристэбитигэр ураты дьоҕурдаах, айылҕаттан айдарыылаах дьоннордоохтор. Үлэттэн быыс буллулар даҕаны, сорох дьон спордунан дьарыктар, атыттар уруһуйдууллар, тигэллэр, уһаналлар. Холобур, Владислав Велигура көмүс куоластаах ырыаһыт, онтон Владимир Стрекаловскай хомоҕой тыллаах хоһоонньут.
Ырыаһыт мааныта
Владислав Велигура, экологическай үөрэхтээһин уонна уопсастыбаны кытары үлэлиир бөлөх салаатын салайааччыта.
Министиэристибэ Боотура
Алексей Афанасьев, информатизация уонна информацияны харыстааһын отделын начаалынньыгын эбээһинэһин толорооччу.
Алексей Алексеевич министиэристибэ иһинэн ыытыллар спортивнай күрэхтэһиилэр, тэрээһиннэр биир тутаах кыттааччылара. Устудьуоннуур кэмиттэн саҕалаан мас тардыһыытынан, армрестлининэн дьарыктанар. Куораттааҕы, өрөспүүбүлүкэтээҕи таһымнаах күрэхтэһиилэргэ кыттан, өрүү бириистээх миэстэҕэ тиксэрэ. Билигин төһө даҕаны идэтийэн туран дьарыктамматар, 2015 сыллаахха судаарыстыбаннай сулууспа уонна уопсастыбаннай хааччыйыы профсойууһа тэрийэр спартакиадатыгар армрестлиҥҥэ бастакы миэстэни ылбыта.
Манчаары оонньууларыгар өрүү кыттар
Александр Новиков, айылҕа харыстабылын Абыйдааҕы иниспиэксийэтин судаарыстыбаннай иниспиэктэрэ.
Киһини өлүүттэн быыһаабыта
Сардаана Кривошапкина, айылҕа харыстабылын Горнайдааҕы иниспиэксийэтин исписэлииһэ.
РФ Президенэ Владимир Путин 2017 сыл олунньу 13 күнүнээҕи ыйааҕынан, Сардаана Кривошапкина «За спасение погибавших» мэтээлинэн наҕараадаламмыта. Ол курдук, икки сыллааҕыта хорсун санаалаах кыыс ууга түспүт кырдьаҕас киһини быыһаан, өлөр-өлүүттэн өрүһүйбүтэ.
Сардаана Горнайдааҕы иниспиэксийэҕэ 2014 сылтан таһаарыылаахтык үлэлии сылдьар. Бу иннинэ үөрэҕирии эйгэтигэр өр сылларга үлэлээбитэ. Биһиги министиэристибэбит эрэ буолбакка, бүтүн өрөспүүбүлүкэ киэн туттар киһитэ – Сардаана улуус, нэһилиэк бастыҥ уопсастыбанньыга. Улуустааҕы, өрөспүүбүлүкэтээҕи таһымнаах спортивнай күрэхтэһиилэр, култуурунай-маассабай тэрээһиннэр тэрийээччилэринэн, кыттааччыларынан буолар.
Мария – «Мисс Виртуальная Якутия» кыайыылааҕа
Мария Заровняева, «Айылҕа харыстабылын министиэристибэтин үлэтин хааччыйар сулууспа» ГКУ бастакы разрядтаах исписэлииһэ.
Айылҕа кэрэ көстүүтүн дьүһүйэр поэт
Владимир Стрекаловскай, «Муома» айылҕа пааркатын судаарыстыбаннай иниспиэктэрэ.
Владимир Петрович иэйиитэ киирдэҕинэ, дууһата аһылыннаҕына, хоһоон суруйарын сөбүлүүр. Үгүс киһи кини айар үлэтин сэҥээрэр. Баҕар, «Саха сирэ» хаһыат ааҕааччылара Долгун диэн илии баттааһыннаах хоһооннору аахтаххытына, «Муома» паарка судаарыстыбаннай иниспиэктэрэ диэн өйдүү биэрээриҥ.
Улуу
Улуу өрүс сүнньүн тутан
Устан иһэбин ыраахтан,
Оҥочом долгуҥҥа күөрэҥнээн
Сүүрүгүм түргэнин сөҕөбүн.
Иннибэр күрүлүүр күрүлгэн,
Эргииргэ туох күүтэр? Билбэппин!
Сөптөөх түкэрдиибин тутаммын,
Ыарахан мэһэйи туоруубун.
Айылҕа оҕото буоламмын
Эбэттэн көрдөһө иһэбин,
Билбэт эбиппин букатын
Сир-дойду дьиктилээх күүстэрин.
Сипсийэр курдуктар долгуннар
Кулгаахпар сылаастык минньийэ,
Эн кыайыаҥ мүччүргэн сырыыны
Көһүннэ иннибэр «Ю» хайа.
Этиэхпин баҕардым бар дьоммор
Харыстааҥ тулалыыр эйгэни,
Хаалларыах тустаахпыт биһиги
Кэлэр көлүөнэ ыччакка
Ырааһы, сырдыгы, кэрэни!
Спортсмен-иниспиэктэр
Анна Домотова, айылҕа харыстабылын Эдьигээннээҕи иниспиэксийэтин судаарыстыбаннай иниспиэктэрэ:
Анна Егоровна оскуолаҕа үөрэнэр сылларыттан спорду кытары «доҕордоһон», ордук сүүрүүнэн, хайыһарынан, волейболунан утумнаахтык дьарыктанар. Элбэхтик оскуола, университет, улуус чиэһин көмүскээбитэ.
Устудьуоннуу сылдьан национальнай көрүҥнэринэн дьарыктаммыта. «Эдьигээннээҕи иниспиэксийэҕэ 2009 сылтан үлэлиибин. «Далбар» улуустааҕы хамаандаҕа баарбын. Фитнес-аэробикаҕа, волейболга, национальнай көрүҥнэргэ улуустааҕы күрэхтэһиилэргэ кыттабыт», – диэн Анна кэпсиир. Дьиэ кэргэнинэн чөл олоҕу тутуһан, айылҕаҕа сылдьалларын, хаамалларын, балыктыылларын сөбүлүүллэр.
Анивера АКИМОВА, «Саха сирэ» хаһыат, edersaas.ru