close
Физкультурник күнүн тэрээһиннэригэр сыллата 40-50 тыһыынча киһи кыттар...
Дьулуур - Олох-дьаһах

Физкультурник күнүн тэрээһиннэригэр сыллата 40-50 тыһыынча киһи кыттар

Сарсын, атырдьах ыйын 11-гэр, Саха сирин олохтоохторо дойду олохтоохторун кытта бииргэ Физкультурник күнүн бэлиэтиэхтэрэ. Бу 1939 сыллаахтан бэлиэтэнэр бырааһынньыгы мөлүйүөнүнэн киһи, идэтиттэн, сааһыттан тутулуга суох, бэйэтин тус бырааһынньыгынан ааҕынар. Бу күҥҥэ анаммыт киэҥ бырагыраамалаах тэрээһиннэр киин куоракка итиэннэ бары муниципальнай тэриллиилэргэ ыытыллыахтара.

edersaas.ru

Киин куоракка сүрүн тэрээһин физическэй култуураҕа уонна маассабай спорка өрөспүүбүлүкэтээҕи управление уонна хаалыктаах хаамыыны сөбүлээччилэр “Стимул” кулууптарын тэрийиилэринэн сарсыарда 11 чаастан “Туймаада” стадиоҥҥа буолуоҕа. Онно Саха Өрөспүүбүлүкэтин Ил Дарханын эбээһинэһин толорооччу Айсен Николаев кыттара күүтүллэр.

Итини сэргэ, 12 чаастан Орджоникидзе болуоссатыгар күүс көрүҥнэригэр сайыҥҥы бэстибээл ыытыллыаҕа. Губин уулуссатыгар баар спорт былаһааккатыгар “Оранжевый мяч” диэн уулусса баскетболугар үгэс буолбут өрөспүүбүлүкэтээҕи күрэхтэһии буолуоҕа.

“Модун”, “Дохсун” спорткомлекстарга Физкультурник күнүн бэлиэтээһин иитинэн, Аһаҕас аан күннэрэ ыытыллыахтара. Онно Дьокуускай олохтоохторо оҕолорун путбуолтан саҕалаан оҕунан ытыыга тиийэ араас секцияларга суруттарыахтара, уопутаах исписэлиистэр тренажернай саалаларга хайдах сөпкө дьарыктанарга сүбэлэри биэриэхтэрэ. Онно сылдьыбыт дьон лотереяҕа кыттан спорткомплекстарга босхо дьарыктанарга ыйдааҕы абонеменнары сүүйүөхтэрин сөп. Өрөспүүбүлүкэҕэ Физкультурник күнүгэр анаммыт тэрээһиннэринэн сыллата ортотунан 40-50 тыһыынча киһи хабылларын тэрийээччилэр этэллэр.

Дьокуускай уокуруктарыгар, куорат таһыгар оскуолалар, олорор дьиэлэр тиэргэннэригэр саҥа спорт былаһааккалара аһыллыахтара. 2017 сыллаахтан үлэлиир “Норуот бүддьүөтэ” бырайыагынан киин куоракка 11 спорт былаһаакката тутулунна.

Саха Өрөспүүбүлүкэтин физическэй култуураҕа уонна маассабай спорка управлениетын салайааччы Николай Цыпандин иһитиннэрбитинэн, Саха сирин олохтооҕун 38,9 бырыһыана, ол эбэтэр 290 тыһыынча киһи, физкультуранан утумнаахтык, нэдиэлэҕэ үстэн итэҕэһэ суох күн, дьарыктанар. Бу көрдөрүүтүнэн өрөспүүбүлүкэ дойдуга сүүрбэ иһигэр, Уһук Илиҥҥи эрэгийиэҥҥэ инники күөҥҥэ сылдьар.

Роман Попов, «Саха сирэ» хаһыат, edersaas.ru

Хаартыска Интэриниэттэн ылылынна.

#бүгүн: 1
0
0

Сайт матырыйаалларын ааптар көҥүлэ суох ылар бобуллар.