Орто Халымаҕа бэйдиэ сылдьыбыт эһэ оҕотун тутан ылан, алтынньы 4 күнүгэр анал рейсинэн Дьокуускай куоракка аҕалбыттара. Тута оборуона министиэристибэтин Ил-76 сөмөлүөтүнэн (Сергей Шойгу быһаччы көмөтүнэн) Москва куоракка ыыппыттара.
Федеральнай сонуннарга Орто Халымаҕа эһэ оҕотун туппуттарын туһунан иһиннэрии тахсаатын кытта Москватааҕы зоопаарка дириэктэрэ Светлана Акулова эһэ оҕотун ыларга бэлэмин туһунан анал суругу ыыппыта. Онно этиллэринэн, кыылы тутуу уонна Орто Халыматтан аҕалыы ороскуотун барытын зоопарка уйунарын туһунан этиллибитэ.
«Эһэ оҕото олус уһуннук айаннаан кэллэ. Күн-дьыл туруга мэһэйдээн биэрдэ. Дьокуускайтан көппүт сөмөлүөт аара Омскайга саппараапкалана түспүтэ, ол кэмҥэ хаар күүскэ түһэн, салгыы көтүү тохтообута. Алтынньы 5 күнүгэр сарсыарда 5 чааска көппүтэ. Эмиэ халлаан туруга мөлтөҕүнэн, көтөр аал сарсыарда 9 чааска Тверь авиапордугар түһэргэ күһэллибитэ. Биһиги анал массыынабыт тиийэн, эһэ оҕотун этэҥҥэ зоопаркаҕа аҕалбыта. Кырачаан доруобуйатын туруга үчүгэй, бэркэ аһыыр-сиир. Биһиги онтон олус үөрдүбүт», – диэн Светлана Акулова кэпсээтэ.
Яков Зарявняев, СӨ айылҕа харыстабылын миниистирин солбуйааччы:
— Кыһыл кинигэҕэ киирбит кыыллар тустарынан сокуон ирдэбилэ кытаанах. Биһиги кыылы атыылыыр бырааппыт суох. Ити боломуочуйаны РФ бырабыыталыстыбата эрэ быһаарар. Эһэ оҕото олус кыра, айылҕатыгар ыыппыппыт буоллар, син биир өлөр этэ.
Александр ТАРАСОВ, «Саха сирэ» хаһыат, https://edersaas.ru