Саха сиригэр кулун тутар 1 күнүттэн муус устар 31 күнүгэр «Олох олорор дьолго махтанабын» акция ыытылла турар. Акция чэрчитинэн, ким баҕалаах сөбүлүүр эмчитигэр махтал тылларын анал аккырыыккаларга суруйан ыытар.
Оттон Өрөспүүбүлүкэтээҕи 2 №-дээх балыыһа—Медицина суһал киинин отделениеларыгар ыарыһахтар сыанабылларын суруйар кинигэлэригэр эмиэ үгүс махтал тылларын астына ааҕыахха сөп.
Зоя Игнатьева, Надежда ЕГОРОВА, «Саха сирэ» хаһыат, edersaas.ru
Люция Семеновна Старостина (Дьокуускай):
«Олунньу ортотугар уулуссаҕа халтарыйаммын, төбөбүнэн күүскэ баран түспүтүм. Табыллыам быатыгар, неврология отделениетыгар киллэрбиттэрэ. Бу отделениеҕа эмтэнэн, олус үчүгэй быраастар үлэлииллэрин биллим, көрдүм. Мин Анастасия Николаевна диэн эдэр бырааска түбэстим. Кини олус билиилээх, дьиҥнээх профессионал эбит. Ыарыһахтарын ис сүрэҕиттэн өйдүүр, настарыанньаларын көтөҕөр. Өссө отделениеҕа элбэх эдэр быраас үлэлиириттэн үөрдүм. Олус ыарахан үлэлээхтэрин үрдүнэн, быраастар уонна медицинскэй сиэстэрэлэр ыарыһахтарыгар болҕомтолоохтук, үлэлэригэр эппиэтинэстээхтик сыһыаннаһаллар. Улахан махталбын уонна үтүө баҕа санаабын отделение сэбиэдиссэйэ Людмила Оконешниковаҕа, быраас Анастасия Ылаховаҕа тиэрдэбин. Кинилэр курдук быраас өссө элбэҕэ буоллар».
Львовтар дьиэ кэргэттэрэ (Дьокуускай):
«Биһиги аҕабыт колопроктология отделениетыгар эмтэммитэ. Быраас Галина Смолинаҕа уонна отделение сэбиэдиссэйэ Михаил Самсоновка идэлэригэр бэриниилэрин иһин махтанабын. Кинилэр үрдүк таһымнаах хирурдар».
Нэлли Георгиевна Жданова (Хаандыга):
«Мин балыыһаҕа Хаандыгаттан санитарнай рейсинэн кэлбитим. Хирургия 1-кы отделениетыгар эмтэммитим. Отделение исписэлиистэрэ – быраастар, медицинскэй сиэстэрэлэр уонна алын сүһүөх үлэһиттэр түргэн-тарҕан үлэлэрин сөхтүм. Олохпун быыһаабыт Сардаана Леонтьеваҕа уонна Евгений О-Жи-Хоҕа нөрүөн нөргүйэбин».
Нюргустана Николаевна Габышева (Кэбээйи улууһа):
«Миигин, тугум да ыалдьыбыта биллибэт киһини, санитарнай рейсинэн аҕалбыттара. Ону үрдүк таһымнаах быраастар Саргылана Ильина уонна Владимир Попов суһаллык эпэрээссийэлээн, этэҥҥэ быыһаммытым. Хирургия 1-кы отделениетын быраастара ыарыһаҕы болҕомтолоохтук истэллэр, эн ыйытыыгар сиһилии хоруйдууллар, ыарыһахтарга барыларыгар истиҥ сыһыаннаахтар».
Н.Ю.Граф:
«Дьылҕа Хаан ыйааҕынан, Волгоградтан эһиги куораккытыгар баар буолбутум. Эмискэ эпэрээссийэлэнэр турукка киирбитим. Хирурдар Саргылана Ильинаҕа, анестезиолог Евгений Александровичка киэҥ билиилэригэр, медицинскэй сиэстэрэлэргэ болҕомтолоох сыһыаннарыгар ис сүрэхтэн махтанабын».
Г.К.Титов, А.В.Сивцев, М.В.Еремеев:
«Биһиги, 5 №-дээх балаата ыарыһахтара, хирургия 1-кы отделениетыгар хирург Евгений Гилев, бэрэбээскилиир сиэстэрэ Лидия Алексеева, пост сиэстэрэтэ Мирослава Саввина, балаата санитарката Клавдия Дмитриева курдук үтүө суобастаах үлэһиттэри балыыһа салалтата болҕомтоҕо ыларыгар баҕарабыт».
А.В.Кадочникова:
«Ыарахан туруктаах «суһал көмөнөн» киирбитим уонна аан бастаан дьуһуурунай хирург Валерий Ермолаев сырдык мичээрдээх мөссүөнүн өйдөөн хаалбытым. Кини «барыта үчүгэй буолуо» диэн уоскуппута. Онтон реанимацияҕа Саргылана Ильина кэлбитэ. Кини үтүөрэрбэр эрэллээҕэ миэхэ бэриллибитэ. Куттаммыт ыарыһахха быраастар бэйэлэригэр эрэллээхтэрэ уонна быһаарыныылаахтара хайдахтаах курдук көмөлөһөрүй? Эһиэхэ сүһүөхтээх бэйэм сүгүрүйэбин».
Н.А.Горошко:
«Хирургия 2-с отделениетын хирура Константин Слепцовка махтанабын. Мин кыайан хаампат буолбутум. Ону миигин, саахар диебеттаах киһини, атахпар туруорда. Эн үөһээттэн ананан кэлбит быраас буолаҕын!»
Е.А.Куулор:
«Хирургия 2-с отделениетын кэлэктиибигэр, чуолаан, эдэр быраас Людмила Игнатьеваҕа улахан махталбын этэбин. Сайаҕас майгыгыт, үтүө санааҕыт, болҕомтолоох сыһыаҥҥыт иһин махтанабын».
Екатерина Дмитриевна Шралеко:
“Хирургия 2-с отделениетын кэлэктиибигэр, быраастар Константин Слепцовка, Айсен Федоровка, орто сүһүөх үлэһиттэр Ольга Ивановаҕа, Снежана Афанасьеваҕа, Денис Жирковка махталбын тириэрдэбин. Саамай улахан махталбын медицинскэй сиэстэрэ Светлана Бусоваҕа аныыбын. Кини ыарыһахтар балааталарыгар мэлдьи мичээрдээбитинэн киирэр, барыларын кытары эйэҕэстик сэһэргэһэр, онтон тахсарыгар барыбытыгар үтүө доруобуйаны баҕарар. Ыарыһахтар көмөҕө ыҥырдахтарына, кини сүүрүүнэн кэриэтэ киирэр уонна барытын түргэнник, ыарыыта суох оҥорор. Үрүҥ халааттаах аанньал идэтин уонна ыарыһахтарын таптыыра, үтүө сүрэхтээҕэ харахха быраҕыллар. Ону сэргэ, хара сарсыардаттан илиилэрин араарбакка үлэлиир санитардар Анастасия Винокуроваҕа, Иннокентий Макеевка бары үчүгэйи баҕарабын».
Р.И Степанова:
«Мин киэҥ билиилээх, гинеколог-хирург Людмила Игнатьеваны көрсүбүппэр дьылҕабар махтанабын. Кини мин кыыһым олоҕун быыһаабыта. Киэҥ дууһалаах, үтүө сүрэхтээх, үрдүк таһымнаах быраас ыарыһахтарын инники олохторун куруук саныыр. Людмила Николаевна, махтал бастыҥа!»
М.В. Поддубнай:
«Проктология отделениетын кэлэктиибин хирурдарыгар көмөҕүт уонна үтүө сыһыаҥҥыт иһин махтанабын. Инникитин да ситиһиилээх үлэни баҕарабын. Саамай «куттас» ыарыһаҕы тулуйбуккутугар махтанабын. Хирург А.А.Соловьевка ураты тылларбын тиэрдэбин».
Костровтар дьиэ кэргэттэрэ (Алдан к.):
«Убаастабыллаах Лена Александровна Кривошапкина! Биһиги уолбутун эмтээбиккитигэр ис сүрэхтэн махтанабыт. Эн кыһамньылаах, үтүө санаалаах уонна аламаҕай бырааскын! Эһиги балыыһаҕытыгар эн курдук үлэһит өссө элбии турдун».
И.А.Борисов:
«Суһал хирургия отделениетыгар үрдүк таһымнаах быраастар сүрэх ыарыһахтары анараа дойдуттан хостууллар. Эһигини аанньалгыт араҥаччылаатын».
Кондратович:
«Кардиология отделениетын үлэһиттэрэ ханнык баҕарар көмөнү уталыппакка оҥороллор. Итини отделение сэбиэдиссэйэ Сардаана Павлова сатабыллаах салайыытынан дии саныыбын».
Ефим Егорович Кардашевский:
«Анестезия-реанимация отделениетын эмчиттэригэр, сэбиэдиссэй Виктор Ковиниҥҥа кэлэктиип сатабыллаах үлэтин иһин махтанабын».
Маннык ис хоһоонноох махтал тыллар салҕанан бара тураллар. Бу сурук дьоруойдара бары «Олох олорор дьолго махтанабын» өрөспүүбүлүкэээҕи акцияҕа кыттыһаллар.
Зоя ИГНАТЬЕВА, Надежда ЕГОРОВА, «Саха сирэ» хаһыат, edersaas.ru