Бу сайын Дьокуускай таһыгар, Атласовтар уһаайбаларыгар 4 миэтэрэ үрдүктээх Туой сэргэ туруоруллубутун туһунан истибитим.
Сэргэҕэ 12 «Айыы» ойууламмыт. Итиэннэ саха норуотун олоҕо-дьаһаҕа дьыл түөрт кэминэн көрдөрүллүбүт.
Бу Үрүҥ илгэ сэргэтэ П.П.Романов аатынан Дьокуускайдааҕы художественнай колледж устудьуоннарын уонна преподавателлэрин көҕүлээһиннэринэн, Валентина, Василий Атласовтар истиҥ өйөбүллэринэн, олоххо киллэриллибит.
Сэргэни ыйы быһа оҥорбуттар. Саха сиригэр бастакы туой сэргэ буолар. Онон, оҥоруутун ньымалара да уратылардаах.
Кирилл Гаврильев, худуоһунньук, П.П.Романов аатынан Дьокуускайдааҕы художественнай колледж дириэктэрэ:
— Олоҥхоҕо үрүҥ илгэ сэргэтин туһунан аахпытым уонна эскиис оҥортообутум. Үрүҥ илгэ сахаҕа — быйаҥ, олох диэн суолталаах. Кымыс, үрүҥ ас. Сылгы, ынах-сүөһү, баай буолар. Ол иһин үүнэр үүнээйи, от-мас барыта сиртэн ситэн үүнэн тахсар, онон сэргэни туойтан оҥорбут киһи диэн санаанан салайтаран, оҥордубут. Туой сэргэ оҥоһулларыгар уу, уот, туой, салгын истихиийэлэрэ холбоһоннор, буһан- хатан тахсар. Үйэлээх, айылҕа матырыйаала буолар. Норуот да ылынар, интэриэһиргээтэ. Эһиил Олоҥхо ыһыаҕар тупсаран оҥорбут киһи диэн баҕа санаа баар. Композициятыгар 12 айыылардаахпыт. Онон боростуой сэргэ буолбатах, үҥэр — сүктэр сэргэ, айыыларга сүгүрүйэр, алтыһар, алгыстанар суолталаах. Мин санаабар, ханна баҕарар –болуоссаттарга, сквердэргэ, паркаларга туруон сөптөөх.
Оттон кыра барыйаана уопсастыбаннай дьиэлэргэ, офистарга, тэрилтэлэргэ анаан оҥоһуллуон сөп.
Татьяна Маркова, edersaas.ru