Бүгүн Дьокуускайдааҕы өрүс пордугар бастакы суудуна кэлэн, 2017 сыллааҕы навигация былааҕа көтөҕүлүннэ. Порка киирбиппитигэр мустубут дьон: «Эмиэ «лорпалар» бастаабыттар! Ким хайа иннинэ бастакы кэлбиттэр», — диэн кэпсэтэллэрин үгүстүк иһиттибит.
Анивера Акимова, «Саха сирэ» хаһыат, https://edersaas.ru/
Навигация үөрүүлээхтик аһыллыытыгар Дьокуускайдааҕы өрүс пордун таһаҕаһы тиэйэр-сүөкүүр оройуонугар ууһуттар, судоходнай хампаанньалар салайааччылара, суруналыыстар муһуннулар. Айан-сырыы саҕаланан, халлааҥҥа харбыаласпыт краннар биир кэм тохтоло суох үлэлээн бардылар.
Александр Прошутинскай хапытааннаах СОТ-1131 суудуна номнуо хаһыс да төгүлүн навигацияны бастакынан саҕалаата. Бу сырыыга «Вилюй» атыы-эргиэн дьиэтигэр тутуу матырыйаалын аҕалан, таһаҕастаах хаһаайын үөрүүтэ үгүс. Үөрүүтүттэн тэрилтэ дириэктэрэ Андрей Ганин махтанан туран, экипажка сабыс саҥа телевизор бэлэхтээтэ.
СӨ тыранааныспарын уонна суол хаһаайыстыбатын миниистирэ Семен Винокуров 2017 сыллааҕы навигацияҕа 3 мөл. тоннаттан тахса таһаҕас тиэллиэхтээҕин иһитиннэрдэ. Мантан 1 мөл. 476,8 тыһ. т аҥардас судаарыстыба наадыйыытыгар. «Аны аҕыйах хонугунан Амма, Бүлүү өрүстэринэн таһаҕаһы тиэйии саҕаланыаҕа. Уопсайа 687 суудуна араас көрүҥэ үлэлиирэ былааннанар», – диэн миниистир бэлиэтээн эттэ.
Уһун кыһыны быһа «нуктаан» олорбут өрүс пордугар номнуо быһыы-майгы сэргэхсийдэ. Ууһуттарга түөрт ыйдаах кытаанах, быһаарыылаах үлэлэрэ саҕаланан, бары ыраах өрүстэринэн, улуустарынан, куораттарынан айанныырга ох курдук оҥостубуттар.
[vc_text_separator title=»» i_icon_fontawesome=»fa fa-anchor» color=»pink» add_icon=»true»]Гаас Илиҥҥи бырагырааматын олоххо киллэриигэ, «Газпром» ПАУо наадыйыытыгар 451 тыһ. т, ол иһигэр «Сибиир күүһэ» магистральнай ситими тутууга 177 тыһ. т таһаҕас тиэллэрэ былааннанар. Маны таһынан, Чайыҥдатааҕы ньиэп-гаас баайдаах сири туһаҕа таһаарыыга анаан 274,38 тыһ. т таһаҕас тиэллиэхтээх. Уопсайа, бу сыалга анаан «Өлүөнэтээҕи холбоһуктаах пароходство» ААУо 58 суудуната үлэлиэҕэ.
Анивера Акимова, «Саха сирэ» хаһыат, https://edersaas.ru/