Умсулҕаннаахтык олорор, айар куттаах, эрчимнээх санаалаах дьон бииргэ түмүстэхтэринэ хайаны да сыҕарытыахтарын сөп курдук. Сэтинньи 9 күнүгэр “Үрүҥ туллук” диэн айар куттаах дьон түмсүүтүн сүрэхтэниитигэр сылдьан итинник санааҕа кэллим.
Куруук олус элбэх саҥа идеялардаах, саҥаны саҕалыыртан, сонуну баһылыыртан толлон турбат Саргылаана Неустроева бэйэтин тула эмиэ бэйэтин курдук дьону түмэн “Үрүҥ туллук” диэн түмсүүнү тэрийбитэ биир сыл буолла.
Түмсүү бастакы бырайыагынан “Подари тепло детям” диэн ыалдьар оҕолорго анаан “Сашок” айар бөлөҕү кытта сымнаҕас оонньууру оҥорон бэлэхтээһин буолбута. Кэлин да ыалдьар, тиийиммэт-түгэммэт олохтоох оҕолорго анаан элбэх күрэхтэһиилэри, тэрээһиннэри ыыппыттара. Быйыл саас Аммаҕа өтөрүнэн буолбатах улахан уу кэлбитигэр, “Үрүҥ туллук” тута куоракка үлэлиир Амма улууһун түмсүүтүн оперативнай штабыгар кубулуйбута. Үтүө санаалаах дьонтон киирбит сылаас таҥаһы, малы-салы түүн-күнүс тохтоло суох бэрийэн, сааһылаан улууска тириэрдиини тэрийэ олорбуттара. Штаб уопсайа 30 т гуманитарнай көмөнү хомуйан халаантан эмсэҕэлээбит араас улуустарга ыыппыта. Түмсүү итинтэн да атын улахан бырайыактары тэрийэн, ыытан кэллэ.
Түмсүү атаҕар бигэтик турбутун бэлиэтиир тэрээһинэ сарсыардаттан эрдэ саҕаламмыта. Айар куттаах элбэх маастардар кэлэн маастар-кылаас ыыппыттара: “Дойдум тааһа” бырайыак киэргэл хайысхатын саҕалаабыт Туйаара Колесова өрүс тааһын киэргэтэн оҥоруу, Айталина Поликарпова флористика, иистэнньэҥ Прасковья Обутова кэтиллибит кыһыҥҥы соҥҥо “иккис тыыны” угуу, Анжелика Устинова сабынан баайыы, үрдүк кылаастаах фотограф Андро Григ, буойулактан сэлээппэ, бэргэһэ оҥоруу маастара Светлана Мальцева уо.д.а. сөбүлүүр дьарыктарын кистэлэҥнэрин билиһиннэрбиттэрэ. Киэһэ маастардар түмсүү сүрэхтэниитигэр кэлбит дьоҥҥо бэйэлэрин үлүһүйэн үлэлиир дьарыктарын туһунан кэпсээбиттэрэ уонна көрдөрбүттэрэ. Моделлар хас биирдии тахсыыларын мустан олорооччулар ытыс тыаһынан көрсүбүттэрэ. Саха сирин Дьахталларын тэрилтэлэрин холбоһугун бэрэссэдээтэлэ Анжелика Андреева, поэт Саргылаана Гольдерова-Саргы Куо, Саха тыйаатырын биллиилээх артыыската Ирина Никифорова “иккис тыыннаммыт” сиэдэрэй оҥоһуулаах соннору (маастар Прасковья Обутова) кэтэн тахсан мустубут дьон улахан сэҥээриитин ыллылар. Кырдьыга да, эргэрдэ диэн ыраах уурбут малларбытыттан-салларбытыттан итинник кэрэ көстүүлээх, сиэдэрэй бэйэлээх оҥоһуктары айар, тигэр, оҥорор мындыр саха дьахталларын сөҕө, хайгыы, ымсыыра көрдүм.
Маастардар айбыт оҥоһуктарын бастакы атыылаһааччыларга анаан оонньоммут сүүйүүгэ “талаан тарбахтаах” Лидия Алексеева киис тириитэ кытыылаах, оҕуруонан киэргэтиллибит былаат-бэргэһэ сүүйэн улаханнык соһуйда даҕаны, астынна даҕаны. Бэлиэтээн эттэххэ, “Үрүҥ туллук” түмсүү чилиэннэрин итинник сиэдэрэй оҥоһуктарын сыаната чэпчэкитин сөхтүм. Онуоха Саргылаана Неустроева устудьуоннарга уонна кырдьаҕастарга өссө эбии чэпчэтии көрүллэрин туһунан эппитэ. Биир бэйэм, эдэр модельер Вилена Иванова дьахталларга аналлаах саҥа-сонун тигиитин – аныгылыы тупсаҕай оҥоһуулаах сутуруону сэргии көрдүм. Кыһынын кылгас остоох атах таҥаһын кытта кэтэргэ олус табыгастаах таҥас эбит.
“Үрүҥ туллук” үс сүрүн хайысханан үлэлиир — бэйэ илиитинэн оҥорон таһаарбыт табаарын атыылааһын; улуустарга үлэлиир маастардары кытта бииргэ үлэлэһэн кинилэр оҥоһуктарын батарарга көмөлөһүү; бэйэ илиитинэн оҥорон таһаарыынан дьарыктаныан баҕалаахтарга маастар-кылаастары, быыстапкалары тэрийии. Итини сэргэ кыаммат-түгэммэт дьоҥҥо, оҕолорго салгыы көмөлөһөр санаатын ыһыктыбат.
Сүрэхтэниигэ кыттыыны ылбыт Усуйаанаттан уонна Өлөөнтөн кэлэ сылдьар дьахталлар хамсааһыннарын салайааччылара “Үрүҥ туллук” филиалын хас биирдии улууска тэрийэргэ ыҥырдылар. Дьоро киэһэни Варя Аманатова кэрэ куолаһынан киэргэттэ. Сүрэхтэниини “Магия торжества” тэрилтэ далбар хотуттара кэлбит ыалдьыттарга тыыннаах роза сибэкки дьөрбөлөрүн бэлэхтээн түмүктээтилэр.
Айар абылаҥ бэйэтэ туспа айылгылаах, ураты умсулҕаннаах буолар эбитин бу киэһэ илэ көрөн итэҕэйдим.
Эбэн эттэххэ: Сүрэхтэнии кэнниттэн тута сарсыныгар Таатта улууһугар “Үрүҥ туллук” филиала аһыллыбытын туһунан үөрүүлээх сонун кэлбит.
Ыспыраапка:
Саргылаана Александровна — “Биир ньыгыл Арассыыйа” партия “Историческая память” өрөспүүбүлүкэтээҕи бырайыагын Сүбэтин бэрэссэдээтэлэ, Саха сирин Дьахталларын тэрилтэлэрин холбоһугун президиумун чилиэнэ, норуот үгэстэрин культуратын Сибиирдээҕи Академиятын профессора, Академия Саха сиринээҕи филиалын уонна “Амма кырдалын ыччата” улуустар икки ардыларынааҕы тэрээһин салайааччылара. Кини Амма улууһун Сулҕаччытыгар кийиит буолан кэлиэҕиттэн Амманы иккис дойду оҥостон, силис тардан, икки уол оҕону төрөтөн улаатыннарда.
Татьяна ПАВЛОВА, «Саха сирэ» хаһыат, edersaas.ru саайтка анаан.