Сотору Дьокуускайга радиология дьиэтэ үлэҕэ киириэҕэ

Бөлөххө киир:

Искэни эмтиир өрөспүүбүлүкэтээҕи диспансеры тутуу боппуруоһа өр сылларга быһаарыллыбакка, тутуллар болдьоҕо сылтан-сыл көһөн испитэ үгүс киһитэ долгутар.

edersaas.ru

Кэмниэ-кэнэҕэс боппуруос сорҕото быһаарыллан, диспансер саҥа дьиэтин сыбаайата түһэриллибитэ, ол иһигэр радиология отделениетын саҥардыы үлэтэ бу сыл бүтүөр диэри түмүктэниэхтээх.

Билиҥҥи туругунан, радиология отделениетын саҥардыы үлэтэ ханнык түһүмэххэ сылдьарын билистэххэ, үлэ график быһыытынан баран иһэр.

Бу күннэргэ СӨ Судаарыстыбаннай сакаасчыт сулууспатын генеральнай дириэктэрин солбуйааччы Алексей Варламов искэни эмтиир 210 куойкалаах өрөспүүбүлүкэтээҕи диспансеры тутуу боппуруостарыгар көһө сылдьар мунньаҕы ыытта.  Мунньах кэмигэр биэдэмистибэлэр икки ардыларынааҕы оробуочай бөлөх чилиэннэрэ үлэ хаамыытын, хаачыстыбатын билистилэр, тутуу кэмигэр тахсыбыт техническэй боппуоруостары быһаарыстылар. Чопчулаан эттэххэ, искэн диспансерын бастакы уочаратын тутуу чэрчитинэн, радиология урукку дьиэтигэр саҥардыы үлэтэ ыытыллар. Маны СӨ Тутууга министиэристибэтэ уонна СӨ Судаарыстыбаннай сакаасчыт сулууспата хонтуруоллууллар.

Радиология эбийиэгэ баар сиригэр тутааччылар 2 670,84 кв.м. уопсай иэннээх 4 сыһыары тутууну ыыталлар. Эмтиир тэрилтэ биэс блоктаах – поликлиникалаах, 30 куойкалаах сытар балыыһалаах, диагностика блоктардаах, сардаҥа терапията куорпустаах, ону сэргэ, быраас кэбиниэттэрдээх уо.д.а. буолуоҕа.

Бүгүҥҥү күннээҕи туругунан, тутуу 63 бырыһыана бэлэм. Хоруобуйаны, муостаны ититии үлэлэрэ түмүктэннилэр, кирилиэстэр уонна пандустар оҥоһулуннулар. Уоту тардааччылар биригээдэлэрэ уот ситимин, сантехниктар сылааһы биэрэр систиэмэни таҥыыны түмүктүүллэр. Бэдэрээтчит тымныылар түһүөхтэрин иннинэ эбийиэк таһын бүтэйдээбитэ, таһырдьатааҥы уоту оҥорбута, киирэр ааны уонна массыыналар турар сирдэрин аспааллаабыта, мас олордубута.

Көһө сылдьар мунньах түмүгүнэн генеральнай бэдэрээтчиккэ эбийиэккэ үлэлиир дьон ахсаанын өссө элбэтэргэ уонна бу нэдиэлэ бүтүүтэ сылааһы биэрэргэ сорудахтаата. Ону тэҥэ, сэтинньи бүтүөр диэри ыраастыыр үлэ барыта бүтүөхтээх.

Алексей Варламов СӨ Доруобуйа харыстабылын министиэристибэтигэр анал медицинскэй тэриллэри хааччыйарга исписэлииһи сыһыарарга этии киллэрдэ.

Радиология отделениета үлэҕэ киириитэ искэн ыарыытын эрдэ быһаарарга уонна ситиһиилээхтик эмтииргэ көмөлөһүө. Ону сэргэ, анал көмөнү оҥоруу хаачыстыбата тупсуоҕар баҕарыллар. Соторутааҥҥа диэри, хаартыскаҕа көстөрүн курдук, ыарыһаҕы илиилэринэн киллэрэр-таһаарар быһыы-майгы аны суох буолуоҕар эрэл үөскүүр.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0