Саха Өрөспүүбүлүкэтин Үрдүкү суутун бэрэссэдээтэлинэн 1999 сыллаахтан үлэлиир Людмила Тимофеевна Горева астаапкаҕа барбытын туһунан legal.report.ru. иһитиннэрдэ.
Вера МАКАРОВА, «Саха сирэ» хаһыат, edersaas.ru
Оннук быһаарыыны бэҕэһээ, кулун тутар 27 күнүгэр, Судьуйалар Үрдүкү квалификационнай коллегиялара ылыммыт. Гореваны сэргэ, Томскай куорат Сэттис арбитражнай апелляционнай суутун бэрэссэдээтэлэ, 61 саастаах Виктор Кребель уонна Тверской уобалас Арбитражнай суутун бэрэссэдээтэлэ, 59 саастаах Алексей Попов эмиэ астаапкаҕа бардылар.
18 сыл биир дуоһунаска үлэлээн баран уурайыы, Людмила Горева ити дуоһунаска олорор сааһа туолбутун кытта сибээстээх.
Кулун тутар 30 күнүгэр Судьуйалар Үрдүкү квалификационнай коллегиялара СӨ Үрдүкү суутун бэрэссэдээтэлин дуоһунаһыгар түөрт кандидатураны көрүөҕэ, ол — Дьокуускай куорат федеральнай суутун бэрэссэдээтэлэ Иван Винокуров, СӨ Үрдүкү суутун бэрэссэдээтэлин солбуйааччылар Александр Седалищев уонна Любовь Летучих, итиэннэ СӨ Үрдүкү суутун судьуйата Евдоким Оконешников.
Ыспыраапка:
Горева Людмила Тимофеевна
1947 сыллаахха Дьокуускай куоракка төрөөбүтэ.
Дьокуускай куорат 8 №-дээх оскуолатын үөрэнэн бүтэрбитэ.
1970 с. Свердловскайдааҕы юридическай институту үөрэнэн бүтэрбитэ.
1970 — 1977 сс. силиэдэбэтэлинэн үлэлээбитэ.
1977 — 1990 сс. — Дьокуускай куорат федеральнай суутун судьуйата.
1990 — 1992 сс. — Дьокуускай куорат федеральнай суутун бэрэссэдээтэлэ.
1992 — 1999 сс. — СӨ Юстицияҕа миниистирэ.
1999 — 2016 сс. — СӨ Үрдүкү суутун бэрэссэдээтэлэ.
Үрдүкү квалификационнай кылаастаах судьуйа, РФ үтүөлээх юриһа.
Вера МАКАРОВА, «Саха сирэ» хаһыат, edersaas.ru
Ааптар хаартыскаҕа түһэриитэ.