Биллэрин курдук, Ил Түмэн дьокутаата, «Колми» автосалон салайааччыта Николай Румянцев бу дьыл балаҕан ыйын 7 күнүгэр, киэһэ хойут киһи өлүүлээх суол быһыылаанын таһааран, суут уурааҕынан дьиэтээҕи хаайыыга ууруллубута.
Быһаарар буоллахха, дьиэтээҕи хаайыы диэн — уорбаланааччыга, буруйданааччыга силиэстийэ бара турар кэмигэр туттуллар хааччахтыыр миэрэлэртэн биирдэстэрэ. Хадатаайыстыбаны силиэдэбэтэл түһэрэр, уурааҕы суут таһаарар.
Румянцевка дьиэтээҕи хаайыы балаҕан ыйын 11 күнүттэн туттуллубута.
«В Якутии.ру» суруйарынан, бэҕэһээ, алтынньы 2 күнүгэр, СӨ Үрдүкү суута Николай Румянцевка хааччахтыыр миэрэтин уларыппыт — дьиэтээҕи хаайыыттан 1,5 мөл. солк. солуогунан босхолообут. Үрдүкү суут сайтыгар ол туһунан официальнай иһитиннэрии суох.
Суут хааччахтыыр миэрэни уларытарыгар, Румянцев эмсэҕэлээччилэргэ — өлүөхсүт оҕолоругар, ону таһынан, икки киһи эмтэнэригэр үбүнэн-харчынан көмөлөһөрүн учуоттаабыт. Эмсэҕэлээччи адвоката бу хадатаайыстыбаны утарбатах.
Санатар буоллахха, бу суол быһылаана Тулагы сэлиэнньэтин аттыгар балаҕан ыйын 7 күнүгэр тахсыбыта. Дьокутаат Николай Румянцев киэһэ хараҥаҕа, күүстээх ардахха «Ниссан Патрол» массыынатынан итирик туруктаах айаннаан иһэн, үс киһини түҥнэри көппүтэ. Биир киһи сонно тута тыына быстыбыта, икки киһи эчэйии ылбыта.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.