close
Үрдүкү суут Сергей Высоких бириигэбэрин уларытта...
Бэрээдэк - Олох-дьаһах

Үрдүкү суут Сергей Высоких бириигэбэрин уларытта

Сайтпытыгар бу дьыл кулун тутар 6 күнүгэр «Ленскэй урукку баһылыгын суут саалатыттан тутан бардылар» диэн иһитиннэриим бэчээттэммитэ. Онно Ленскэй оройуонун урукку баһылыга Сергей Высоких дьыалатыгар тахсыбыт суут бириигэбэрин билиһиннэрбитим.

edersaas.ru


Санатар буоллахха, Сергей Высокихха холуобунай дьыала 2014 сыл сэтинньи ыйыгар тэриллибитэ. РФ Холуобунай кодексатын 159-с ыст. 4-с чааһынан, ол эбэтэр, сулууспа балаһыанньатынан туһанан, атын дьон ураты бөдөҥ кээмэйдээх үбүн-малын хорон сиэһиҥҥэ түөкүннээһин бэлиэтэ баарынан.

Силиэстийэ бара турар кэмигэр Высоких дуоһунаһыттан босхоломмута. Хааччахтыыр миэрэ быһыытынан, киниэхэ дьиэтээҕи хаайыы туттуллубута.

Бастакы суут быһаарбытынан, 2013 сыл ахсынньытыгар баһылык Высоких көҕүлээһининэн, чааһынай дьонтон (ол иһигэр, кини сокуоннай ойоҕуттан) оҕо саадыгар диэн, федеральнай бүддьүөттэн 56 мөл. солк. суумалаах дьиэ атыылаһыллыбыт. Ити харчыттан 28 мөл. солк. Высоких ойоҕун счетугар ыытыллыбыт.

Ити дьыала тэриллиэ түөрт сыл иннинэ, муниципальнай тэриллии ити дьиэни  бастаан биир киһиэхэ атыылаабыт, онтон 1 мөл. солк. суумаҕа  бэйэтэ билэр дьонун кытта атыыласпыт.

Ону ааһан, бу дьиэ бары өттүнэн хайдах даҕаны оҕо саада буолар кыаҕа суоҕа силиэстийэ кэмигэр биллибит. Үлэһиттэрэ киниэхэ ону этэ-быһаара сатаабыттарын, Высоких аанньа ахтыбатах.

Ленскэй оройуоннааҕы суутун уурааҕынан, сууттанааччы Сергей Высоких буруйдааҕынан билиниллэн, 3 сылга уопсай эрэсиимнээх холуонньаҕа көҥүлэ быһыллыбыта, манна эбии 300 тыһ. солк. суумалаах ыстараап төлүүргэ ууруллубута.

Оттон СӨ Үрдүкү суутун пресс-сулууспата иһитиннэрбитинэн, бүгүн, бэс ыйын 19 күнүгэр, СӨ Үрдүкү суута Сергей Высоких албакаатын апелляционнай үҥсүүтүн көрбүт. Албакаат, Высоких ончу буруйа суох, онон киниэхэ быыһыыр бириигэбэр тахсыахтаах диэн туруорсубут.

Үрдүкү суут холуобунай дьыаланы уонна албакаат үҥсүүтүн үөрэтэн-көрөн, өрүттэр санааларын истэн баран, Ленскэй оройуоннааҕы федеральнай суутун бириигэбэрин уларытарга уонна сымнатарга быһаарбыт. 

Итиэннэ ол сымнатан, уларытан, сууттанааччы Сергей Высокиҕы 2 сыл 10 ыйга көҥүлүн быһарга уонна 270 тыһ. солк. суумалаах ыстараап төлүүргэ уурда.

Вера МАКАРОВА, «Саха сирэ» хаһыат, edersaas.ru

Хаартыска: интэриниэттэн.

0
0

Сайт матырыйаалларын ааптар көҥүлэ суох ылар бобуллар.
Facebook
Facebook
Instagram
GOOGLE
http://edersaas.ru/rd-k-suut-sergej-vysokih-biriigeberin-k-t-rde/
  1. 1 санаа

    Буойа

    Аата ыстарааба кыратын!
    Сиэбит харчытын барытын төннөрүөхтэрин!

    19.06.2017

  2. Дьэ, итинник быһаарар сууппут((

    19.06.2017

Санааҕын хааллар

INSTAGRAM ЛЕНТАТА

Instagram батыһан бар