Үөрэҕи саҥа бүтэрбит ыччаты үлэҕэ ыларга тиэтэйбэттэр

Ааптар: 
Бөлөххө киир:

Үлэлээх буолууну көҕүлээһин сылыгар ыччаты үлэнэн хааччыйыы боппуруоһа инники күөҥҥэ турар. Онон сибээстээн уонна күрэхтэһии чэрчитинэн, “Ыччат үлэлээх буолуутугар “Эдэр профессионаллар” (Ворлдскиллс) Сойуус оруола” диэн “төгүрүк остуол” буолан ааста.

edersaas.ru

Мунньахха СӨ үөрэҕин уонна наукатын миниистиэристибэтин үлэһиттэрэ, орто үөрэх тэрилтэлэрэ, үлэ биэрээччи тэрилтэлэр, ыҥырыылаах ыалдьыттар кытыннылар. Тэрээһин биир сүрүн уратытынан – аҥаардастыы кэпсэтии эрэ буолбакка, орто анал үөрэх тэрилтэлэрэ үөрэхтэрин бүтэрбит ыччаттарын хайдах үлэнэн хааччыйалларын туһунан уопуттарын атастастылар. Ити кэпсэтииттэн урутаан түмүк оҥордоххо, үөрэх кыһата төһөнөн элбэх тэрилтэлэри кытта дуогардаһар да, соччонон элбэх ыччат үлэнэн хааччыллар эбит. Холобура, Дьокуускайдааҕы сервис технологическай техникумун 2016 сылга бүтэрбиттэртэн 72 %, 2017 с. — 89,4 % үлэнэн хааччыллыбыт. Быйыл барыллаан ааҕыыларынан 96,9 % үлэнэн хааччыллыах курдугун ыйаллар.

Уопсайынан, кэлин үлэҕэ ылыы урукку курдук эн кыһыл дуу, күөх дуу, ону ааһан үрдүк дуу, орто дуу үөрэҕи бүтэрбиккэр улаханнык кыһаммат буолан эрэллэр. Сайдыылаах омук дойдуларыгар курдук үөрэххэ киирээччи идэтигэр сатабылын көрөр кэм кэллэ. Оччотугар, биэс сыл остуолга олорон үөрэммиттээҕэр, миэстэтигэр баазаларга, былаһааккаларга илии-атах буола сылдьыбыт киһи уопута быдан таһыччы буоллаҕа. Онон Арассыыйаҕа  даҕаны ити холобур киирэн эрэр. Сатабылы, дьоҕуру көрдөрөр араас куонкурустары тэрийэн ыыталлар. Олортон “муҥур ыраахтааҕыларынан” “Эдэр профессионаллар” (Ворлдскиллс) буолар. Спортсменнар олимпиадаҕа кыттан кыайыылааҕы быһааралларын кэриэтэ, Worldskills чөмпүйэнээт эдэр киһи илиитин сатабылын олимпиадата буолар.

“Анал холбоһуктар уонна “Эдэр профессионаллар” (Ворлдскиллс Арассыыйа) оробуочай каадырдар агенстволара” эрэгийиэннээҕи сойууһун управлениетын салайааччытын солбуйааччы Данил Уфимцев, туһааннаах Сойуус оруолун туһунан кэпсээтэ. Маныаха кини, бастакытынан, үлэнэн ордук талааннаах ыччаты хааччыйар кыалларын биллэрдэ. Ол эрээри, чөмпүйэнээккэ, сүүмэрдиир күрэхтэһиилэргэ кыттааччы уопсай ахсаана үрдүгүн, ити эдэр дьоҥҥо үгүс уопуту иҥэрэрин ыйда. Иккиһинэн, бу хамсааһын устудьуоннары эрэ буолбакка, оскуола үөрэнээччилэрин эмиэ хабара улахан оруоллааҕын санатта. Дойду бэрэсидьиэнин сорудаҕынан 2018 сылтан “Билет в будущее” диэн бырайыак олоххо киирэрин иһитиннэрдэ.

Дьокуускайдааҕы индустриальнай-педагогическай кэллиэс быраактыкаҕа сэбиэдиссэйэ Альбина Борисенко  устудьуоннар  ортолоругар ыытыллыбыт ыйытык көрдөрбүтүнэн, 30 ыччат промышленнай тэрилтэлэргэ үлэлиэхтэрин баҕаралларын биллэрбиттэр. Ол эрээри, улахан промышленнай тэрилтэлэр салайааччылара эдэр исписэлиистэр ыстаастара 3 сылтан кыра буоллаҕына  ыла сатаабаттарын эттэ. Ити курдук, “төгүрүк остуол” атын даҕаны кыттыылаахтара кэккэ проблемалары ыйдылар.

СӨ үөрэҕин уонна наукатын миниистирин солбуйааччы Андрей Попов: “Ыччаты үлэнэн хааччыйыы — уһулуччу суолталаах боппуруостартан биирдэстэрэ. Сыллата үлэнэн хааччыллыы үрдээн иһиэхтээх. Боппуруоһу быһаарар инниттэн кэмиттэн-кэмигэр үлэ биэрээччилэри, тэрилтэ салайааччыларын кытта көрсөбүт”, — диэн түмүктээн эттэ.

 

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0