Уус Алдаҥҥа анал дьаһалынан ыытыллыбыт “Ийэ тылбар, сахалыы саҥабар тирэҕирэн…” нэдиэлэ өрө көтөҕүллүүлээхтик ыытыллыбыт. Тэрээһиҥҥэ улуустааҕы сокуоннай саастарын туола илик оҕолору реабилитациялыыр киин кэлэктиибэ көхтөөхтүк кыттыбыт. Бу туһунан дириэктэр Сталина Данилова иһитиннэрдэ.
—Ийэ тыл уонна сурук-бичик күнүгэр аналлаах нэдиэлэ олус сэргэхтик ааста. Киин үлэһиттэрэ суруйбут диктаннарын хамыыһыйа кичэллээхтик көрөн баран, кыайыылааҕынан эдэр исписэлииһи В.П.Кондратьеваны ааттаата уонна киниэхэ анал кубогы дохсун ытыс тыаһыгар арыаллатан туттарда. Хамыыһыйа чилиэттэрэ кини ситиһиитэ эдэрдэргэ үтүө холобур буоларын бэлиэтээтилэр, эһиилги сылга ыччаттар өссө көхтөөхтүк кытталларыгар баҕардылар. Ситиһиилэр итинэн муҥурдамматылар. Ол курдук, тэрилтэ кылаабынай бухгалтера В.И.Татаринова “Кыраһыабай буочар”, социальнай педагог В.П.Данилов “Ыраастык суруйуу” анал аат хаһаайыттарынан буолан үөрдүлэр-көттүлэр.
“Поэзия чааһыгар” оҕотуттан улахан дьонугар тиийэ эрдэттэн бэлэмнэнэн кыттыбыттара ураты буолла. Биирдиилээн хоһоон ааҕыыта куонкурустан итэҕэһэ суох долгутуулаахтык барда. Ыалдьыттар хоһоон ааҕааччылар чуордук, улаханнык эрэ буолбакка, туттан-хаптан көрдөрөллөрө, ис дууһаттан иэйэн туран ааҕаллара болҕомтону олус тардарын ордук астынан бэлиэтээтилэр. Түмүккэ саха норуота таптыыр, ытыктыыр бэйиэтэ, биир дойдулаахпыт Г.Г.Вешников—Баал Хабырыыс төрөөбүтэ 100 сылынан “Тыл” диэн хоһоонун бары күргүөмүнэн ааҕыылара олус табылынна.
“Саха суолун тобулан” диэн эр дьоҥҥо анаммыт тэрээһин түһүлгэтигэр кииҥҥэ иитээччинэн үлэлиир И.И.Окоемов тоҕус уолу илдьэ сылдьан арчылаппытын, сүрдэрин бөҕөрөттөрбүтүн улаханнык астыннылар, киэн тутуннулар. Түмүктээн эттэххэ, төрөөбүт тылга тапталы көрдөрүү, сүгүрүйүү күннэрэ өйгө-санааҕа дириҥник иҥтилэр, — диэтэ.
Сардаана Баснаева, “Саха сирэ” хаһыат, edersaas.ru