Бүгүҥҥүттэн Москваҕа Уһук Илин регионнарын күннэрэ саҕаланнылар. Тэрээһиннэр чэрчилэринэн, “биир гектарга” туһуламмыт улахан быыстапка, үлэ миэстэтин дьаарбаҥката, араас консультация, көрсүһүү, кэпсэтии, о.д.а. ыытыллыахтара.
Уһук Илин регионнарын күннэрэ быйыл аан бастакытын ыытыллаллар. Тэрээһиннэр куорат араас былаһааккатынан барыахтара. Саамай улахан быыстапка “Экспокииҥҥэ” туруоҕа. Манна сүрүн болҕомтону “биир гектар” бырагыраама ылыаҕа. Санатан эттэххэ, билигин бу бырагырааманан Россия бары муннугуттан ким баҕарар сайаапка биэрэн Уһук Илин регионнарга биир гектар сири быстаран ылар кыахтанна.
Ону сэргэ үлэ миэстэтин дьаарбаҥката киэҥ сэҥээриини ылыаҕа. Уһук Илин регионнарын сайыннарыы министиэристибэтэ иһитиннэрэринэн, кэлиҥҥи сылларга биһиэхэ уонна ыаллыы сытар регионнарга үлэлиэн баҕалаах киһи ахсаана эбиллэн иһэр. Онуоха бу регионнарга тэриллибит урутаан сайдар сирдэр улахан оруолу ылаллара биллэр.
Быыстапкалары, дьаарбаҥкалары сэргэ үрдүк үөрэх кыһаларыгар лекциялар ыытыллыахтара. Манна Уһук Илин регионнарга үлэлии сылдьар инвестордар бэйэлэрин үлэлэрин-хамнастарын туһунан кэпсиэхтэрэ. Тэрээһиннэр бүгүҥҥүттэн саҕаланан баран ахсынньы 16 күнүгэр түмүктэниэхтэрэ.
Ыспыраапка: Саха сиригэр сэтинньи ый түмүгүнэн, барыта 18879 сайаапка киирбитэ. Мантан билигин 5437 сайаапкаҕа дуогабар түһэрсиллибит. Үксэ бэйэбит дьоммут дуогабардаспыттар. Атын регионтан сайаапка биэрэн 27 киһи сир ылбыт.
Аграфена КУЗЬМИНА, “Саха сирэ” хаһыат, edersaas.ru