Олунньу 13 күнэ — Төрөөбүт тыл уонна сурук-бичик күнэ. Хас биирдии сахабын дэнэр киһи, мин курдук сахалыы тыллаах төһө элбэҕий, хас үөрэх тэрилтэтигэр сахалыы үөрэтэллэрий диэн толкуйдаан көрөр буолуохтаах.
Д.К.Сивцев-Суорун Омоллоон аатынан Опера уонна балет Судаарыстыбаннай тыйаатырыгар Төрөөбүт тыл уонна сурук-бичик күнүн үөрүүлээх мунньаҕар этиллибит сыыппараларга сигэннэххэ, Саха сиригэр баар орто анал үөрэх 48 тэрилтэтигэр 17 тыһ. кэриҥэ ыччат саха тылын үөрэтэр эбит. 652 уопсай үөрэхтээһин тэрилтэтэ баарыттан, 419 оскуолаҕа саха тылынан үөрэтэллэр үһү. Ити оскуола уопсай ахсааныттан 64 % тэҥнэһэр. Ону таһынан, 121 оскуолаҕа саха тылын судаарыстыбаннай тыл быһыытынан үөрэтэллэр. 726 уһуйаантан 520-гэр 30 тыһ. тахса оҕо сахалыы иитиллэр эбит. Итиннэ даҕатан эттэххэ, былырыын саха тыллаах 104 хаһыат уонна 50 сурунаал баара ыйыллар.
Мунньахха кыттыбыт СӨ бырабыыталыстыбатын бэрэссэдээтэлин солбуйааччы, СӨ Ил Дарханыгар Тыл бэлиитикэтин сэбиэтин бэрэссэдээтэлэ Михаил Гуляев иһитиннэрбитинэн, СӨ үөрэхтээһин 2016-2022 сылларга сайдыытын Судаарыстыбаннай бырагыраама иһинэн тыллары харыстыыр, үөрэтэр уонна сайыннарар сыаллаах бырагыраама иһинэн үлэлиир.
Былырыын Арассыыйа Генеральнай борокуратуурата уонна Рособрнадзор национальнай субъектарга үөрэх салаатыгар судаарыстыбаннай уонна төрөөбүт тыллары үөрэтиигэ бэрэбиэркэ ыыппыттара. “Бэрэбиэркэ өрөспүүбүлүкэҕэ тыл, үөрэхтээһин туһунан уо.д.а. сокуоннары, нормативнай докумуоннары РФ Үөрэҕирии туһунан сокуонугар олоҕуран чопчулаата. Нуучча уонна саха тыллара дьүөрэлэһэн, сайдар усулуобуйалара тэриллибитин бэлиэтээтэ”, — диэн эттэ.
Людмила ПОПОВА, “Саха сирэ” хаһыат, edersaas.ru
Василий ПАК хаартыскаҕа түһэриитэ.