Бу күннэргэ өрөспүүбүлүкэтээҕи үөрэх үлэһиттэрин атырдьах ыйынааҕы мунньахтара буола турар. Мунньах сыллата ыытыллар итиэннэ ааспыт үөрэх дьылыгар барбыт үлэни ырытар, баар кыһалҕалары быһаарар, кэлэр сыллааҕы сүрүн соруктары торумнуур аналлаах.
Урутаан эттэххэ, быйылгы мунньах ааспыт сыллартан үгүс уратылаах ааһан эрэр. Бастатан туран, Хаҥалас улууһун Өктөмүгэр уруһуй уонна муусука учууталларын маҥнайгы форума ыытылынна. Үс күн устата барбыт тэрээһин тустаах биридимиэттэргэ болҕомто уурулларыгар суолу-ииһи хаалларыах тустаах.
Иккиһинэн, СӨ Үөрэҕин уонна наукатын миниистирэ Владимир Егоров оҥорбут дакылаата мустубут дьон болҕомтотун тарта. Маны мунньахха кыттыбыт Ил Дархан Егор Борисов тус бэйэтинэн бэлиэтээтэ. Дакылаакка аҥардас сыыппаралар эрэ буолбакка, бэргэн этиилэр, холобурдар киирбиттэрэ ордук сытыырхатта.
Үсүһүнэн, тустаах миниистир хас күн ахсын дириэктэрдэри кытта атах тэпсэн олорон сэһэргэһэр, сүрүн соруктары кэпсиир, ыйыылары биэрэр, кинилэр ыйытыыларыгар хоруйдуур. Ол курдук, маҥнайгы күн оскуола, иккис күн профессиональнай үөрэх тэрилтэлэрин дириэктэрдэрин, үһүс күн улуустааҕы үөрэх управлениетын начальниктарын кытта көрсөр.
“Кэлэр сылларга аан дойду таһымыгар күрэстэһэр кыахтаах көлүөнэни иитэн, үөрэтэн таһаарыахтаахпыт. Каадыр боппуруоһун быһаарарга өрөспүүбүлүкэҕэ ылыллыбыт стратегическай сайдыы тосхоллорун тутуһуохтаахпыт, онон сирдэтиниэхтээхпит”, — диэн Ил Дархан тыл этэригэр тоһоҕолоон бэлиэтээтэ.
Миниистир Владимир Егоров чугастааҕы кэмҥэ регион таһымыгар турар биэс сүрүн соругу ыйда. Ол курдук, оҕо аймаҕы, ыччаты иитэр кэнсиэпсийэни оҥоруу, каадыры бэлэмнээһин, сыл түмүктэниэр диэри “Саха сирин айдарыылаах оҕолоро 2018-2023 сс.” кэлимсэ бырагырааманы оҥоруу, WorldSkills хамсааһынынан норуоттар икки ардыларынааҕы быраактыканы олоххо киллэриини салгыы ыытыы, эһиил Дьокуускайга буолуохтаах норуоттар икки ардыларынааҕы “Интеллектуальнай оонньууларга” бэлэмнэниини чорботон бэлиэтээтэ. Итинтэн сиэттэрэн, улуус таһымыгар ыытыллыахтаах үлэ хайысхаларын эмиэ чопчулаата.
Бүгүн, сарсын “СӨ үөрэҕин уонна наукатын систиэмэтигэр инники турар бырайыактар” үөрэх сессията, “Үөрэх эйгэтин федеральнай судаарыстыбаннай надзора: кыһалҕалар, түмүктэр, быраап тирэхтэрэ”, РФ Бэрэсидьиэнэ Владимир Путин “РФ Оҕо аймах 10 сылын биллэриитин туһунан” ыйааҕа олоххо киириитин чэрчитинэн, Уһук Илин уокурук кыттыылаах мунньахтар о.д.а. тэрээһиннэр ыытыллыахтара.
Людмила ПОПОВА, «Саха сирэ» хаһыат, edersaas.ru
Айаал ЧЕРНОГРАДСКАЙ хаартыскаҕа түһэриитэ.