Егор Борисов Анал этиитигэр биһиги өрөспүүбүлүкэбит нэһилиэнньэ ахсаана үүнэн иһиитин көрдөрүүтүнэн дойдуга үс бастыҥ эрэгийиэн иһигэр сылдьарын бэлиэтээтэ. Онон үлэҕэ, үлэ ресурсаларыгар сыһыаны уларытар ирдэммит.
Алексей Дьячковскай, Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы:
– Ил Дархан Анал этиитэ өрөспүүбүлүкэ социальнай-экономическай сайдыытыгар, хас биирдии киһи олоҕун таһымын тупсарыыга ыытыллар үлэ сүрүн тосхоло буолар. Егор Афанасьевич бырабыыталыстыба иннигэр бөдөҥ бырамыылысаннай тэрилтэлэргэ олохтоох дьон үлэлии киирэригэр көмөлөһөр соругу туруорда. Итиннэ бастатан туран, үөрэхтээһин ситимэ уонна идэҕэ туһаайар үлэ төрдүттэн тупсарыллыахтаах. Күрэстэһэр кыахтаах, идэтин толору баһылаабыт исписэлиистэри бэлэмниэхтээхпит. Иккиһинэн, үлэ оҥорумтуотун үрдэтиигэ күүскэ үлэлиэхтээхпит, хамнаһы үрдэтиини умнуо суохтаахпыт. Бэрэсидьиэн Путин ыам ыйынааҕы ыйааҕын олоххо киллэрии чэрчитинэн, бүддьүөт уонна экономика сиэктэрин үлэһиттэрин хамнастарын үрдэтии быйылгы төрдүс кыбаарталыттан саҕаланна, кэлэр сылга эмиэ түһүмэҕинэн үрдэтиллиэҕэ. Үһүс суол ирдэбилинэн үлэлииргэ сөптөөх усулуобуйаны тэрийии буолар. Оччотугар эрэ саҥа үлэ миэстэлэрэ тахсан, дьон үлэтэ суох буолуута, бэл, орто анал уонна анал үрдүк үөрэҕи бүтэрбит эдэр дьон үлэ булбакка сылдьаллара тохтотуллуоҕа. Ити курдук, Анал этии биһиги үлэбит сүрүн хайысхаларын ыйда.
Манна эбэн эттэххэ, РФ бэрэсидьиэнэ Владимир Путин үөрэхтээһин боппуруоһун үрдүктүк тутар.
Раиса Сибирякова, “Саха сирэ” хаһыат, edersaas.ru