Сэтинньи 25 күнүгэр Удачнайдааҕы хайа-байытар кэмбинээккэ саахал тахсыбыт төрүөтүн «АЛРОСА» АК маннык быһаарар.
Ол курдук, шахта сиҥнэн түспэтэх. Анал үлтүрүтэр комплекска бытарытыллан тахсыбыт уулаах хайа боруодата сууллубут. Бүгүн рудник үлэлии турар.
Тахсыбыт быһылаан Удачнайдааҕы хайа-байытар кэмбинээт алмааһы хостуур былааныгар тугунан да дьайыа суоҕа. Санатар буоллахха, рудникка сылга 4 мөл. т руда хостонор. Бүгүҥҥү дааннайынан, 39 сыл устата хостонор руда саппааһа баара биллэр.
Сэтинньи 25 күнүгэр «АЛРОСА» АК салалтата президент Андрей Жаров кыттыылаах хампаанньа бырабылыанньатын мунньаҕар кэлэ сылдьан, Удачнайдааҕы сир аннынааҕы рудникка ыытыллыбыт хапытаалынай тутууну көрбүт. Руданы үлтүрүтэр комплексы көрөр кэмнэригэр ити быһылаан буолбут. Боруода маассата түһүүтүгэр хампаанньа икки үлэһитэ эт-хаан эчэйиитин ылбыт.
Бүгүн боруода маассата туох биричиинэттэн халыйан түспүтүн быһаараллар. Итини тэҥэ, бу күннэргэ Ростехнадзор уонна хампаанньа тустаах сулууспалара барытын сыныйан көрүөхтэрэ-истиэхтэрэ.
«АЛРОСА» АК президенэ Андрей Жарков салалтатынан эчэйиини ылбыттарга сөптөөх көмө оҥоһуллубут.
Александр ТАРАСОВ.