close
Кыайыылаах урбаанньыт Руслан Федотов
Олох-дьаһах

Кыайыылаах урбаанньыт Руслан Федотов

«Сахамедиа» биллэрбит «Саха сирин киэн туттуута» куонкуруһун интэриниэт куоластааһынын уочараттаах түһүмэҕэ бастыҥ предприниматели талыыга туһуламмыта.

Саха сирин 21 улууһуттан 30 урбаанньыт тыҥааһыннаахтык бэйэ-бэйэлэрин кытта киирсибиттэрэ. Финалга тахсыбыт биэс киһи олунньу 12 күнүттэн 16 күнүгэр диэри бастыыр иһин күрэстэспиттэрэ.

Предприниматель куонкуруһугар олунньу 8 күнүнээҕи түмүгүнэн (бастакы түһүмэх) бастыҥнар кирбиилэригэр Хачатур Аракелян, Руслан Федотов, Александр Никифоров, Виктория Федорова, уонна Владимир Чириков киирбиттэрэ.

Бастакы түһүмэххэ Дьааҥы урбаанньыта Владимир Чириков бастакылар ахсааннарыгар киирэн, биэс финалист иһигэр сылдьыбыта. Онтон ыраах айан суоппардара биир ньыгыл кэккэнэн “түһүнэн” кэбиһэн  Таатта улууһуттан суоппар-предприниматель Никифор Кутугутов биэс финалист бүтэһиктээх киирсиитигэр хапсыбыта.

Олунньу 12 күнүттэн (иккис түһүмэх) «Саха сирин киэн туттуута» норуот куоластааһыныгар бастаабыт биэс урбаанньыт туспа куоластааһыҥҥа киирсэр буолта.

Бу биэс киһиттэн кыайыылаах олунньу 16 күнүгэр билиннэ. «Сахамедиа» тэхиньиичэскэй сулууспата бэрт кичэллээх бэрэбиэркэни ыытта. Ордук элбэх куолас СИА сүрүн сирэйигэр киирдэ.  Facebook, ВКонтакте уонна Instagram курдук дьон сөбүлээн туһанар социальнай ситимнэригэр эмиэ үгүс киһи куоластаата. Урбаанньыттар куонкурустарыгар интэриниэтинэн куоластааһыҥҥа уопсайа 14383 куолас киирдэ.

Финалга тахсыбыттар

Руслан Федотов — Амма улууһа. «Руслан» маҕаһыын, Мэҥэ Хаҥалас улууһугар «Лээги» атыы-эргиэн киин салайааччыта. Киниэхэ 5716 куолас киирдэ (274 — социальнай ситим).

Александр Никифоров — Дьокуускай к. «КопирТехСервис» ХЭУо салайааччыта. Киниэхэ — 3173 куолас (163 — социальнай ситим).

Виктория Федорова — Дьокуускай к. «Виктория» миэбэл-салон тиһик,  «Victory Clinic» медицинэ клиникатын салайааччыта. Киниэхэ 2819 куолас киирдэ (78 — социальнай ситим).

Никифор Кутугутов — Таатта улууһа. Ыраах айан суоппара. «Кутугутов Н.Л. ИП» салайааччыта. Киниэхэ — 1848 куолас (1 куолас — социальнай ситим).

Хачатур Аракелян — Өлүөхүмэ улууһа.  «Норд-Строй» ХЭУо салайааччыта. Киниэхэ — 1832 куолас (50 — социальнай ситим).

Кыайыылаах — Руслан Федотов

«Аҕам Еремей Максимович Федотов, ийэм Ольга Петровна Максимова уонна эбэм бар дьоммор өйөбүлү оҥорууну кыра эрдэхпиттэн ииппиттэрэ», – диэн бэлиэтиир Амма уонна Мэҥэ Хаҥалас улуустарын бочуоттаах мецената. Руслан Федотов аҕатынан Мэҥэ Хаҥалас Наахаратыттан тардыылаах. Амма улууһун 2 №-дээх Чакыр орто оскуолатын выпускниктара бизнесмен меценаттан харчынан сэртипикээт туталлар. Бу нэһилиэги кини иккис төрөөбүт дойдутунан ааҕар. Ааттаах-суоллаах бизнесмен төһө да 61 сааһын туоллар, дууһата сытар үлэтит тэн тэйэр санаата суох. Кини оҥорбут дьыалатын эрэллээх илиигэ туттаран, оҕолорун бэйэтин бизнеһин сайыннарарга номнуо үөрэттэ. Ол курдук, кыргыттара Вера уонна Любовь аҕаларын маҕаһыыннарыгар сэбиэдиссэйдииллэр. Онон аҕа оҕолоругар кини дьыалатын салгыылларыгар икки бүк эрэнэр.

«Саха сирин киэн туттуута» куонкурус туһунан Руслан Федотов санаатын маннык тиэрдэр:

Мин өрөспүүбүлүкэ киин улуустарын кытта ыкса сибээстээхтик үлэлиибин. Онон күрэхтэһии хаамыытын кэтээн баран, кыайыыбар эрэммитим. Бары да кыахтаах финалистар кииристилэр. Бу, кырдьык да, Саха сирин киэн туттар дьоно. Кинилэр нэһилиэнньэни үлэнэн хааччыйан, өрөспүүбүлүкэ социальнай-экэнэмиичэскэй сайдыытыгар улахан кылааттарын киллэрэ сылдьаллар. Бу маннык куонкурустар үлэбитин саҥалыы тыынныыллар, санаабытыгар күүс эбэллэр. Онон «Сахамедиа» холдинг сонун тэрээһини тэрийбитигэр барҕа махталбын тиэрдэбин.

«Саха сирин киэн туттуута» бырайыак –

үлэ дьонун чиэстээһин

Бастыҥнары    инники күөҥҥэ таһаарар «Саха сирин киэн туттуута» куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт, үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.

Бэлиэтээн эттэххэ, «Саха сирин киэн туттуута» бырайыак Саха сирин Судаарыстыбаннаһын күнүгэр биллэриллибитэ. Ол курдук, алтынньыга ыытыллыбыт «Бастыҥ учуутал» номинацияҕа Чурапчы оскуолатын учуутала Владислав Кривошапкин, сэтинньигэ   —«Ыччат лиидэрэ» номинацияҕа ХИФУ профсойууһун кэмитиэтин салайааччыта Артём Иванов кыайбыттара. Ахсынньыга «Быраас» номинацияҕа кыайыылааҕынан   2 №-дээх өрөспүүбүлүкэтээҕи балыыһа бырааһа Степан Тордуин, оттон «Култуура диэйэтэлэ» номинацияҕа Сунтаарга   үҥкүү бөлөҕүн салайар Августина Клакинова бэлиэтэммитэ.

Тэрээһин генеральнай партнера — саха национальнай иһитин оҥорор «Көмүлүөк» фирма.

 Елена ПОТОЦКАЯ «Саха сирэ» хаһыат, edersaas.ru

#бүгүн: 1
2
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

9 − два =