Тас дойдуга олохсуйбут биир дойдулаахтарбыт Саха сиригэр көһөллөрүгэр көмө оҥоһуллуо
Тас дойдуга олохсуйбут биир дойдулаахтарбыт Саха сиригэр көһөн кэлэллэригэр анаан көмө көрүллүө. Ол курдук, 2018-2019 сылларга өрөспүүбүлүкэҕэ 100 киһи олохсуйа кэлиэҕэ. Сылга 50-нуу киһи көһөрүллүөҕэ. Ол иһигэр, 20 киһи — судаарыстыбаннай бырагыраама кыттыылаахтара уонна 30 киһи кинилэр дьиэ кэргэттэрэ, диэн бэҕэһээ СӨ бырабыыталыстыбатын бэрэссэдээтэлин солбуйааччы Денис Белозеров иһитиннэрдэ.
edersaas.ru
Атырдьах ыйын 9 күнүгэр Денис Белозеров биэдэмистибэлэр икки ардыларынааҕы бастакы мунньаҕын видео-сибээһинэн улуустары кытта ыытта.
Кини этэринэн, бастатан туран, өрөспүүбүлүкэҕэ наадалаах исписэлиистэри аҕалыахтара. Ирдэбил быһыытынан, Саха сиригэр көһөр дьон үөрэхтэрин уонна идэлэрин учуоттуохтара. Исписэлиистэр арктикатааҕы уонна бырамыысыланнай улуустарга олохсуйа барыахтара. Ол курдук, Арктика улуустарыттан — Аллайыахаҕа, Анаабырга, Аллараа Халымаҕа, Булуҥҥа уонна Усуйаанаҕа. Бырамыысыланнас улуустарыттан — Алдаҥҥа, Ленскэйгэ, Миирнэйгэ уонна Нерюнгрига.
Көһөн кэлэр биир дойдулаахтарбытыгар СӨ бүддьүөтүттэн араас социальнай көмө оҥоһуллуоҕа. Ол курдук, дьиэ куортамныылларыгар 10 тыһ.солк. диэри харчынан, 10 тыһ. солк. матырыйаалынай көмө оҥоһуллуоҕа. Маны таһынан, доруобуйаларын көрдөрүнэллэригэр көмө, атын дойдуга гражданстволаахтар доруобуйаларын көрдөрүнэллэригэр 3 тыһ.солк. диэри үп көрүллүөҕэ.
Санатан эттэххэ, тас дойдуга олохсуйбут биир дойдулаахтарбытын Арассыыйаҕа көһөрүү судаарыстыбаннай бырайыага дойду бэрэсидьиэнэ Владимир Путин көҕүлээһининэн оҥоһуллубута. 2017 сыл ахсынньы 22 күнүгэр дойду премьер-миниистирэ Дмитрий Медведев судаарыстыбаннай бырайыак иитинэн «Тас дойдуга олохсуйбут биир дойдулаахтарбытын Саха Өрөспүүбүлүкэтигэр көһөрүү» бырагырааматын бигэргэппитэ. 2018 сыл тохсунньу 30 күнүттэн, бырагыраама «СӨ олохтоохторун үлэлээх буолууларыгар өҥө» судаарыстыбыннай бырайыак чэрчитинэн барар буолбута.
Николай Попов, «Саха сирэ» хаһыат, edersaas.ru