Балаҕан ыйын 28-30 күннэригэр Македония киин куоратыгар — Скопьеҕа ыытыллыбыт бэтэрээннэр ортолоругар көҥүл тустууга аан дойду чөмпүйэнээтиттэн саха үс бөҕөһө үс мэтээллээх эргилиннэ.
Саха тустууга оскуолатын икки иитиллээччитэ — Сергей Слепцов (Мэҥэ Хаҥалас) уонна Вадим Данилов (Уус Алдан) үөлээннээхтэрин ортолоругар пьедестал иккис үктэлин дабайдылар. Оттон Тааттаттан Петр Осипов боруонса мэтээл хаһаайынынан буолла.
Бөҕөстөр бэйэлэрин кэмнэригэр хапсаҕайынан ситиһиилээхтик дьарыктаммыттара, өрөспүүбүлүкэтээҕи түһүлгэлэр кыайыылаахтарынан, призердарынан буолаллар. Ол курдук, Сергей Слепцов көҥүл тустууга ССРС спордун маастара, хапсаҕайга Манчаары оонньууларын чөмпүйүөнэ уонна призера, Вадим Данилов – хапсаҕайга Саха сирин маастара, Петр Осипов эдэригэр көҥүл тустуунан дьарыктаммыта, кэлин хапсаҕай күрэстэригэр кыттар. Сергей Слепцов итиэннэ Вадим Данилов бу иннинэ бэтэрээннэр ортолоругар аан дойду чөмпүйэнээтигэр кыттан тураллар, онно үһүс миэстэлэри ылбыттара.
Арассыыйа тустууктара бу чөмпүйэнээккэ биэс кыһыл көмүс, тоҕус үрүҥ көмүс уонна уон боруонса мэтээли ылан, хамаанданан түмүккэ бастакы миэстэҕэ таҕыстылар.
Роман ПОПОВ, «Саха сирэ» хаһыат, edersaas.ru
Хаартыска интэриниэттэн ылылынна.