Бэҕэһээ, бэс ыйын 24 күнүгэр, Үс Хатыҥҥа дьоллоох Туймаада үбүлүөйдээх ыһыаҕа үөрүүлээхтик аһылынна.
Туймаада ыһыаҕа быйыл уратылаах, ол курдук, киин куораппыт ыһыаҕа Саха сирэ Россия судаарыстыбатын састаабыгар киирбитэ 385 уонна тапталлаах Дьокуускайбыт 385 сылларыгар ананар, итиэннэ, бу Үс Хатыҥҥа лоп-курдук 20-с сылын ыһыллар ыһыах буолар.
Татьяна Маркова, «Саха сирэ» хаһыат, https://edersaas.ru/
Күммүт-дьылбыт да анаан-минээн туран биэрэн, дьон-сэргэ санаата кэлбит. Гиннесс рекордугар кытта, саханы ааттатаары, оҕолуун-уруулуун, эдэрдиин-эмэнниин дьон баһыйар үксэ сахалыы таҥаһын сайбаччы кэтэн кэлбитэ көрүөххэ кэрэтин!
Дьон Алгыс ылан, ыраастаныы сиэрин-туомун тутуһан, мүөттээх салгынынан дуоһуйа тыынан, астыммыт көрүҥнээх.
Туймаада ыһыаҕын үөрүүлээхтик аһыы, үгэс быһыытынан, театрализованнай дьүһүйүүнэн саҕаланна. Быйыл, биллэн турар, ыһыах култуурунай бырагырааматын кыттыылаахтара Дыгын кэмнэрин, Саха сиригэр нуучча казактара кэлиилэрин, Саха сирэ Россия састаабыгар киириитин уустаан-ураннаан, дьүһүйэн көрдөрдүлэр.
Ыһыах биир чаҕылхай түгэнинэн, сүүһүнэн тыһыынча ыһыах дьонун-сэргэтин Саха Өрөспүүбүлүкэтин Ил Дархана Егор Борисов истиҥ эҕэрдэтэ буолла.
Егор Афанасьевич, өрөспүүбүлүкэбит кэлэр кэрэ кэскилигэр эрэнэрин биллэрэн туран, бэйэтин тылын уонна култууратын түҥ былыргы кэмнэртэн харыстаан, бүөбэйдээн уонна сайыннаран илдьэ кэлбит норуотугар дириҥник махтанна, Туймаада ыһыаҕа — бу араас омук бэрэстэбиитэлэ олорор, айар-тутар өрөспүүбүлүкэбит дьонун бүттүүммүт бырааһынньыга, диэтэ.
Куорат Аҕа баһылыга Айсен Николаев Туймаада ыһыаҕын дьонун-сэргэтин, күндү ыалдьыттарын эҕэрдэлээн, быйылгы үбүлүөйдээх ыһыах уратыларын бэлиэтээн туран, Үтүө санаа бэлиэтинэн баран иһэр дьылга элбэх омук бэрэстэбиитэлэ олорор-үлэлиир Дьокуускай куораппыт өссө тупсарыгар, сайдарыгар эрэнэрин биллэрдэ.
Туймаада ыһыаҕын үөрүүлээх аһыллыытыгар Ил Түмэн Бэрэссэдээтэлэ Александр Жирков, дьокутааттар, РФ Федеральнай Мунньаҕын Федерация Сэбиэтин чилиэнэ Александр Акимов, СӨ I Бэрэсидьиэнэ Михаил Николаев, Москваттан, Кызылтан (Тыва), Кэриэйэ Өрөспүүбүлүкэтиттэн, о.д.а. омук дойдуларыттан ыалдьыттар кытыннылар, истиҥ эҕэрдэ тыллары эттилэр.
Ити курдук, күндү ыалдьыттарын кыынньар кымыһынан айах тутан, Туймаада ыһыаҕа үөрүүлээхтик саҕаланна.
Уонна дьэ, быйылгы ыһыах саамай умнуллубат түгэнинэн буолуохтаах тэрээһин бэрэстэбиитэлин – Гиннесс рекордун Кинигэтин судьуйатын Правин Пателы ыһыах дьоно бу күн уруйдуу-айхаллыы көрүстэ.
Онон, күн иккис аҥарыгар Гиннесс рекордун сэргэ “Дыгын оонньуулара”, “Саламаат-2017”, норуот маастардарын түһүлгэлэрэ, ыһыах киэргэлэ – оһуохай, онтон да атын оонньуу, ырыа-тойук, көр-нар, араас быыстапкалар, куонкурустар ыһыах дьонун болҕомтотун тартылар. Дьон олус көхтөөх. Күнүс куйааска ыччат-дьон сөтүөлээн да абыранна. Оттон киэһэлик, сөрүүн түһүүтэ, тарбахтартан тардыһан, оһуохайга киирэн ойон-тэбэн биэрээччи өссө үгүс буолла.
Хонууга сиэдэрэй сибэкки курдук, ыһыах дьоно түһүлгэтин бэркэ тэриммит.
“Быйыл массыыналары 3 сиринэн киллэрэннэр, урукку сылларга курдук, үтүрүһүү суох, барыта уурбут-туппут курдук буолан иһэр…”, — диир аҕам саастаах ыһыах ыалдьытын санаатыгар сөбүлэһиэххэ сөп.
Туймаада ыһыаҕа салҕанар.
Татьяна Маркова.
ЯСИА хаартыскалара.