“Якутскэнерго” тэрилтэ үлэһитэ үс игирэ аҕата буолла диэн “Сахаэнерго” АУо пресс-сулууспата үөрүүлээх сонунун суруйар.
Бэҕэһээ, атырдьах ыйын аҕыс күнүгэр, Желлаевтар дьиэ кэргэн Перинатальнай киинтэн таҕыстылар. “Сахаэнерго” Өлөөннөөҕү РЭС үлэһитэ Юрий Желлаев тапталлаах кэргэнин Туйаараны уонна күн сирин саҥа көрбүт игирэчээннэрин үөрүүлээх, долгутуулаах быһыыга-майгыга көрүстэ.
Өрөспүүбүлүкэтээҕи перинатальнай кииҥҥэ үс игирэ күн сирин көрүүтэ аан бастаан буолла. Игирэчээннэр уонна ийэ барахсан этэҥҥэлэр. Бу күүтүүлээх, үөрүүлээх күнүнэн Желлаевтары “Якутскэнерго” генеральнай дириэктэрин солбуйааччы Ирина Сысолятина уонна “Сахаэнерго” профкомун бэрэссэдээтэлэ Евгений Стручков итиитик-истиҥник эҕэрдэлээтилэр. Үс игирэлээх дьиэ кэргэҥҥэ дьол, үөрүү, байылыат олох үс бүк элбииригэр баҕардылар. Сотору энергетиктэр игирэчээннэргэ анаан үлэспит кэлээскэлэригэр кырачааннар күүлэйдиэхтэрэ диэн үөрүүлэрин суруйаллар. “Якутскэнерго” генеральнай дириэктэрэ Александр Слоик эдэр төрөппүттэри видеонан эҕэрдэлээбит, кырачааннар аҕаларын туйахтарын хатаралларыгар баҕарбыт.
Желлаевтар икки улахан кыыстаахтар. Биирэ — үһүс, иккиһэ бастакы кылааска үөрэнэллэр. Ыал аҕата Юрий үс игирэни күүтэллэрин туһунан истэн баран, аан бастаан наһаа соһуйбут, онтон кэргэнин доруобуйатын туһуттан улаханнык долгуйбут. Соһуччу үөрүүлээх сонунтан арыый уоскуйан баран, үс кып-кырачаан оҕо биирдэ күн сиригэр баар буола түһэриттэн, элбэх оҕо аҕата буоларыттан наһаа үөрбүт, долгуйбут.
“Кыыспытын Ариана, улахан уолу Андриан, кыра уолу Арсен диэн ааттаатыбыт. Билигин оҕолорум тустарыгар туох баар кыһамньыбын уурабын. Тапталлаах кэргэним сылайбатын курдук куруук көмөлөһүөхтээхпин. Оччоҕо ийэбит оҕолорбутун бэйэтин үүтүнэн уһуннук эмтэриэ этэ. Өссө дьиэ кэргэн аҕа баһылыга буоларбынан, игирэчээннэрбин туох баар наадалаахтарынан барытынан хааччыйыахтаахпын”, — диир Юрий.