Убаастабыллаах педагогтар, педагогическай үлэ бэтэрээннэрэ!
Ис сүрэхпиттэн идэлээх бырааһынньыккытынан – Учуутал күнүнэн эҕэрдэлиибин!
Үрдүк хаачыстыбалаах үөрэх Саха сирин сайдыытын тумус туттар сүрүн хайысхатынан буолар. Үөрэхтээһин киириитэ биһиги өрөспүүбүлүкэбитигэр дьон олоҕун төрдүттэн уларыппыта, Арассыыйа уонна аан дойду норуоттарын кытта дьоһуннаах миэстэҕэ турарга көмөлөспүтэ. Бүгүн – киэҥ билии, информацияны бас билээһин, үрдүк култуура уонна үөрэхтээх буолуу сахаларга үгүс кыаҕы үөскэтэр.
Педагогтар уонна төрөппүттэр, наука эргимтэтэ, уопсастыбаннас бары түмсэн оҕолорбут өй, майгы-сигили, эт-хаан өттүнэн сайдалларыгар бары кыаҕы биэриэхтээхпит. Билиилэрэ-көрүүлэрэ хаҥыырыгар, толкуйдуур дьоҕурдара, интеллектуальнай кыахтара үрдүүрүгэр көмөлөһүөхтээхпит. Биһиги иннибитигэр өрөспүүбүлүкэ хайа баҕарар муннугар олорор оҕо билии, култуура сыаннаһын уонна аныгы наука хардыыларын иҥэринэр уопсастыбаннай эйгэтин олохтоон үөрэх систиэмэтин уларытар сорук турар.
Үөрэхтээһиҥҥэ уонна иитиигэ уларыта тутууну оҥорооччу – педагог! Айар үлэҕит күүһүнэн үөрэнээччилэргит олоххо көрүүлэригэр, майгыларыгар-сигилилэригэр, дьылҕаларыгар элбэҕи уларытар кыахтааххыт.
Соторутааҕыта, Судаарыстыбаннас күнүгэр Дьокуускайга Учуутал бульварын арыйбыппыт. Онно ССРС норуодунай учуутала Михаил Алексеевка анаан өйдөбүнньүк туруоруллубута. Кини урукку, уустук кэмҥэ тыа уһук сиригэр ураты оскуоланы тэрийбитэ. Михаил Андреевич Үөһээ Бүлүүтээҕи физика-математика оскуолатыгар сахалар ситиһиилэрин саҥа ньыматын тобулбута, биһиги наука киэҥ киэлилээх салаатыгар үлэлиир кыахтаахпытын уонна үлэлиэхтээхпитин дакаастаабыта.
Тус бэйэбэр Михаил Алексеев бүтүн көлүөнэ өйө-санаата уларыйыытыгар педагог оруола сүҥкэн, чаҕылхай буоларын холобура. Үксүбүтүгэр Учуутал оруола ити курдук.
Биһиги уопсастыбабыт сайдарын туһугар ыытар араас өрүттээх үлэҕит иһин педагог идэлээхтэргэ барыгытыгар махтанабын! Кытаанах доруобуйаны, дьолу, дьиэ кэргэҥҥитигэр үтүө туругу уонна махталлаах үөрэнээччилэри!
СӨ Ил Дархана Айсен Николаев.