«Саха сирин доруобуйатын харыстабылыгар медицина сайдыытын саҥа түһүмэҕин кэрэһэлиир кэрэ-бэлиэ түгэн тосхойдо», – диэн Өрөспүүбүлүкээтээҕи 2 №-дээх балыыһа-Суһал медицинскэй көмө киинин хирургияҕа кылаабынай бырааһын солбуйааччы Гаврил Собакин Саҥа дьыл иннинэ үөрүүлээх сонуну иһитиннэрдэ.
edersaas.ru
Ол курдук, балыыһа ожоговай киинигэр киһи тириитин олордууга бастакы холонуу эпэрээссийэ аан бастаан оҥоһулунна. Маннык эпэрээссийэни оҥоруох иннинэ исписэлиистэр улаханнык эмсэҕэлээбит киһи тириититтэн фрагменнары ылан, Медицина институтун килиэккэлэри үөрэтэр лабораториятыгар биэрбиттэр. Ол кэнниттэн сотору кэминэн чөлүгэр түһэриллибит килиэккэлэри ыарыһахтар баастарыгар көһөрөн биэрдилэр.
Ол туһунан ХИФУ Медицинаҕа институтун клеточнай технологияларга уонна регенеративнай медицинаҕа лабораториятын сэбиэдиссэйэ Иван Троев:
«Биһиги киһи тириитэ регенерациятыгар анаммыт биотехнологическай бородууктаны оҥоробут. Онуоха тирии фрагменнарын ылабыт, лаборатория усулуобуйатыгар килиэккэлэри үөскэтэбит. Фибробластердар бэйэ тириитэ улаатарыгар көмөлөһөллөр.
Сотору кэминэн клеточнай технологиялар ожоговай кииҥҥэ туһаныллар буолуохтарыгар эрэнэбит», – диэн быһаарда.
Научнай чинчийиилэр СӨ Доруобуйа харыстабылын министиэристибэтин, ХИФУ уонна диплом кэннинээҕи үөрэхтээһин Арассыыйатааҕы медицинскэй академиятын икки ардыларыгар түһэрсиллибит сөбүлэһии чэрчитинэн ыытыллаллар. Научнай сүрүннээччинэн Арассыыйа Доруобуйатын харыстабылын министиэристибэтин штаты таһынан кылаабынай комбустиолога, Арассыыйа ожоговай киинин салайааччы, профессор Андрей Алексеев буолар. Кини Саха сиригэр 2015 с. научнай-практическай конференцияҕа кыттан уонна ожоговай киин базатын, каадырдары бэлэмнээһини билсибитэ. Ол кэнниттэн бу ньыманы Медицина институтун кытары боруобалаан көрөргө этии киллэрбитэ.
Светлана Семенова, Өрөспүүбүлүкэтээҕи 2 №-дээх балыыһа ожоговай отделениетын сэбиэдиссэйэ:
«Өрөспүүбүлүкэҕэ аан бастаан ожоговай отделение ыарыһахтарыгар бэйэлэрин фибробластардарын көһөрүүнү аан бастаан саҕалаатыбыт. Маннык эпэрээссийэни оҥоруохпутун олус баҕарар уонна былаанныыр этибит. Бу эпэрээссийэ кэнниттэн эмтэнии түмүктээх буоларыгар, баас түргэнник үтүөрэригэр эрэнэбит. Бу, бастатан туран, тириилэрин уокка улаханнык сиэппит ыарыһахтарга наадалаах ньыма. Маныаха дьэ, килиэккэ-технологиялар (клеточные технологии) туһалыыллар».
Надежда ЕГОРОВА, «Саха сирэ» хаһыат, edersaas.ru