СӨ Наукаларын академията тэриллибитэ 25 сыла

Ааптар: 
Бөлөххө киир:

1993 сыллаахха СӨ бастакы бэрэсидьиэнэ М.Е.Николаев көҕүлээһининэн СӨ Наукаларын академията тэриллибитэ. Бастакы бэрэсидьиэнинэн 1994 сыллаахха т.н.д., бэрэпиэссэр В.В.Филиппов талыллыбыта. Ити кэмтэн ыла үйэ чиэппэрэ ааста.
edersaas.ru


Академия тэриллибитэ 25 сылыгар аналлаах научнай уопсастыбаннаc үөрүүлээх мунньаҕар, СӨ Наукаларын академиятын бэрэсидьиэнэ Игорь Колодезников: “Наука атаҕар турар уустук түһүмэхтэрэ аастылар. Национальнай академия дойдуну кытта саҥа кэрдиискэ таҕыста. Наука уонна уопсастыба сайдыытыгар тутаах проблемалары быһаарарга биһиги дискуссионнай былаһааккалары сайыннарыахтаахпыт, эрэгийиэн уонна дойду сайдыытыгар социальнай-экэнэмиичэскэй этиилэри кэмигэр киллэриэхтээхпит, аныгы коммуникацияны барытын туһаныахтаахпыт. Уопсастыба наука туругун барытын билэ-көрө олоруохтаах. Оттон наука, уопсастыбаҕа тыҥаан турар кыһалҕалары өйдүөхтээх уонна ону быһаарарга туруонуохтаах”, — диэн эттэ.


СӨ Бырабыыталыстыбатын бэрэссэдээтэлэ Владимир Солодов:Бүгүн Академия социальнай-экономическай сайдыыга улахан оруоллаах, өрөспүүбүлүкэ научнай, интеллектуальнай кыаҕын түмэр. Биһиги болҕомтобутун уурар боппуруостарбытыттан, өрөспүүбүлүкэ территориятыгар аан дойду таһымнаах, баар соруктары быһаарар наука уонна научнай-үөрэтэр кииннэри тэрийии боппуруостарыгар үлэлэһэбит. Бастатан туран, аан дойду наукатыгар дьоһуннаах миэстэни ылар ордук күөн күрэстэһэр хайысханы көрөбүт. Итини сэргэ биһиги учуонайдарбытыгар прикладной соруктар тураллар”, — диэн бэлиэтээтэ.


Оттон Ил Түмэн бэрэссэдээтэлин солбуйааччы Антонина Григорьева ахсынньы 10 күнүгэр сөпсөһүннэрэр хамыыһыйа мунньаҕар өрөспүүбүлүкэҕэ Комплекснай научнай чинчийиини ыытыыга 220 мөл. солк. сыллата көрүллэр үбүлээһин ситиһиллибитин туһунан иһитиннэрдэ.


Манна даҕатан эттэххэ, 1993 сыллаахха Арассыыйаҕа Саха сирэ үсүһүнэн бэйэтэ академия тэриммитэ. Аан бастакынан Татарстан уонна Башкортостан Өрөспүүбүлүкэлэрэ национальнай Академияламмыттара. Бэлиэ тэрээһиннэргэ тустаах академиялар салайааччылара эмиэ кытыннылар. Татарстан Өрөспүүбүлүкэтин Наукаларын академиятын бэрэсидьиэнэ Мякзюм Салахов эҕэрдэлээн туран, наука араас салааларыгар бииргэ үлэлэһиини сайыннаралларын, кыттыгас бырайыактары толороллорун эттэ.
Башкортостан Өрөспүүбүлүкэтин Наукаларын академиятын бэрэсидьиэнэ Альфис Гаязов Башкортостан уонна СӨ Наукаларын академиялара бииргэ үлэлэһэллэрин ыйда. Итиэннэ холобур быһыытынан “Дьулуруйар Ньургун Боотур” олоҥхо башкир тылыгар тылбаастанарын туһунан быһаарыы ылыныллыбытын иһитиннэрдэ.

Людмила ПОПОВА, “Саха сирэ” хаһыат, edersaas.ru

Мария ВАСИЛЬЕВА (СИА) хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0