Өрөспүүбүлүкэҕэ навигация үһүс түһүмэҕэ түмүктэнэрэ чугаһаан иһэр. Ууһуттар билигин саамай ыарахан учаастакка – хоту өрүстэргэ үлэлииллэр. Бүгүҥҥү туругунан, «Өлүөнэтээҕи холбоһуктаах пароходство» ААУо 195 тиэхиньикэтэ тиэйии-таһыы үлэтигэр сылдьар.
Анивера Акимова, «Саха сирэ» хаһыат, edersaas.ru
Бу күннэргэ Дьокуускайдааҕы өрүс пордугар «Капитан Орлов», «Миргород» суудуналарга таһаҕаһы тиэйии саҕаланна. Таһаҕас Тиксиигэ уонна Халыма өрүһүн бата олорооччуларга тиийиэхтээх.
Өлүөнэ, Дьааҥы уонна Индигир өрүстэргэ сарсыарда өттүгэр туман хойдон, суудуналар сырыыларын харгыстыырын туһунан пароходство пресс-сулууспата иһитиннэрдэ.
Ууһуттар сүрүн болҕомтолорун билигин Дьааҥынан Уус Куйгаҕа тиэрдиллиэхтээх таас чоҕу таһыыга уураллар. Манна Евгений Шутилов хапытааннаах СПН-729 үлэлиир. Оттон Индигиргэ быйыл хаһааҥҥытааҕар да уу элбээн, Ленанефть-2043, Ленанефть-2001, Ленанефть-2041, Ленанефть-2064 танкердар Чокурдаахха уонна Белай Гораҕа диэри тиийдилэр.
Хаартыска: А. Курило.
Анивера Акимова, «Саха сирэ» хаһыат, edersaas.ru