Олунньу 2, 3, 4 күннэригэр Хотугулуу-Илиҥҥи федеральнай үнүбэрсиэт ааҕар саалатыгар норуот тапталлаах суруйааччыта Софрон Данилов «Сүрэх тэбэрин тухары» («Пока бьется сердце») арамааныттан быһа тардыыны ааҕыыга кастинг ыыттылар.
Онлайн-бырайыакка баҕалаах бары кыттыыны ылла. Ол курдук, көхтөөх кыттыыны устудьуоннар, оскуола оҕолоро, учууталлар о.д.а ыллылар. Барыта 300-чэ киһи кытынна.
Тэрийээччи-Хотугулуу-Илиҥҥи федеральнай үнүбэрсиэт. Бу күн кастинг Мирнэй, Нерюнгри куораттарыгар эмиэ ыытылынна.
Маассабай ааҕыыны «Каренина. Живое издание», «Чехов жив», «Мастер и Маргарита. Я там был» бырайыактар ааптардара Фекла Толстая өйөөтө. — «Маннык бырайыактар салҕанан бара туралларыттан олуһун үөрэбин. Үөлээннээхтэрим ХИФУ тэрийбит тэрээһиннэрин сөбүлээтим. Кулун тутар 3 күнүгэр ыытыллыахтаах онлайн-ааҕыы урдук таһымҥа ааһыаҕа диэн бүк эрэллээхпин», — диэн санаатын үллэстэр.
Эбэн этэр буоллахха, бырайыагы норуот поэта Наталья Харлампьева, Саха сиринээҕи суруйааччылар сойуустарын бэрэссэдээтэлэ Иван Мигалкин, “Дьулуур” оҕо түмсүүтүн бэрэссэдээтэлэ Геннадий Охлопков, Дьокуускай куораттааҕы Дуума бэрэссэдээтэлэ Александр Саввинов, “Саханефтегазсбыт” хампаанньа дириэктэрэ Игорь Никитин о.д.а өйөөтүлэр.
Бырайыак дириэктэрэ Валентина Дьяконова:
— Бырайыагы маннык ааҕыылар куратордара Фекла Толстая уонна Софрон Данилов аймахтара өйөөбүттэриттэн олуһун үөрдүбүт. Технология сайдыбыт кэмигэр саха төрүт литературатын, Софрон Данилов айымньыларын мультимедиа нөҥүө билиһиннэриэхпит, ситим нөҥүө ааҕааччылары түмүөхпүт. Бу айымньы туспа кинигэ быһыытынан тахсыбыта быйыл 50 сыла туоларынан уонна саха литературатыгар бастакы социально-психологическай арамаан буоларын быһыытынан таллыбыт. Инникитин маннык хабааннаах тэрээһиннэри өссө да тэрийэр былааннаахпыт.
Үүнэн эрэр көлүөнэ, билиҥҥи сайдыылаах ыччат маннык тэрээһиннэргэ кыттара, бэйэтин холонон көрөрө хайҕабыллаах суол. Эдэр киһини төрөөбүт тылга, литератураҕа сыһыарыы, ааспыт кэм биллиилээх поэттарын, суруйааччыларын үрдүк ааттарын үйэтитии сыаллаах тэриллибит улахан үлэ бу күн биир санаалаах, көрүүлээх дьону түмтэ. Билиҥҥи сайдыылаах кэм ыччата төрөөбүт литературатын историятын, силиһин-мутугун билэрэ олус наадалаах уонна туһалаах.
Кастинг түмүгэ олунньу ый бүтүүтэ биллиэҕэ. Онтон кулун тутар 3 күнүгэр Софрон Данилов айымньытыттан быһа тардыыны онлайн-ааҕыы буолуоҕа. Манна Дьокуускайтан, Нерюнгриттан 295 киһи кыттыаҕа. Быһа биэрии күөх экраҥҥа 9 чааска көстүөҕэ.
Мария МАКАРОВА.