close
Үс саха бөҕөһө Беларусь чөмпүйэнээтигэр үс мэтээли ылла. Онтон иккитэ — кыһыл көмүс...
Дьулуур - Олох-дьаһах

Үс саха бөҕөһө Беларусь чөмпүйэнээтигэр үс мэтээли ылла. Онтон иккитэ — кыһыл көмүс

Бүгүн Минскэй куоракка түмүктэммит Беларусь чөмпүйэнээтигэр Ньургун Скрябин уонна Владислав Андреев кыһыл көмүс мэтээллэри ыллылар. Өссө биир саха тустууга Андрей Бекренев үһүс миэстэҕэ таҕыста.

Урут иһитиннэрбиппит курдук, тохсунньу 12-13 күннэригэр Беларусь көҥүл тустууга чөмпүйэнээтэ буолла. Минскэй көбүөрүгэр саха тустууга оскуолатын үс иитиллээччитэ — Владислав Андреев (57 кг), Андрей Бекренев (57 кг) уонна Ньургун Скрябин (61 кг) — күрэс былдьаста.

57 киилэҕэ диэри ыйааһыҥҥа аҕыс бөҕөс туһунна. Манна түмүк хапсыһыыга 2014 сыллааҕы аан дойду боруонса призера Владислав Андреев сүрүн утарсааччытын, дойду былырыыҥҥы чөмпүйүөнүн Димчик Ринчиновы, этэргэ дылы, илиилээх-атахтаах оҥорбото, 6:3 ахсаанынан хотто. Итинэн бу ыйааһыҥҥа бүгүҥҥү күҥҥэ бастакы нүөмэр буоларын итэҕэттэ.

Финал аҥарыгар Андреевка хотторбут Андрей Бекренев боруонса мэтээли былдьаһар күөн көрсүһүүгэ кадеттар ортолоругар Европа чөмпүйэнээтин кыттыылааҕын Илья Лихомановы баһыйа тутта —  10:0.

Иван Ярыгин турнирын кыайыылааҕа Ньургун Скрябиҥҥэ Белоруссия чөмпүйэнээтигэр сүрэхтэниитэ эмиэ соргулаах буолла. Кини 61 киилэҕэ маастарыстыбатынан утарсааччыларыттан төбө үрдүк буоларын көрдөрдө. Ньургун кыайыылааҕы быһаарар хапсыһыыга Зубков мемориалын призерун Дмитрий Пригожайы этэргэ дылы, илиилээх-атахтаах оҥорбото.

Бу күрэхтэһии түмүгүнэн муус устар 30 — ыам ыйын 6 күннэригэр Каспийскайга (Арассыыйа) Европа чөмпүйэнээтигэр кыттар Беларусь хамаандата сүүмэрдэниэҕэ.

Роман Попов, «Саха сирэ» хаһыат

Хаартыскалар: интэрниэттэн.

#бүгүн: 1
1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

4 × пять =