Үс сыл — дьиэтэ суох

Бөлөххө киир:

Эрэдээксийэҕэ биэнсийэлээх, 2-с группалаах инбэлиит Лариса Ивановна Дабаева кэлэ сырытта. Кини саахалланар туруктаах дьиэҕэ олорор эрээри, үс сыл устата дьиэ ылбакка сылдьар.


Семен Данилов аатынан уулусса 14/1 №-дээх дьиэтин 14-с кыбартыыратыгар кини 30 сыл олорбут. Билигин дьиэ 95% хаарбах туруктаах. Былырыыҥҥыттан ыла хаарбах туруктааҕынан билиниллэн, олохтоохторо көһөрүллүү бырагырааматыгар киирбиттэр.

— Дьиэ сууллар кутталлаах, — диир кини. – Киирэр аан таһынан истиэнэтэ 30 см аппайан турар. Ол онон тымныы үрэ турар, кыстыыр кыах суох. Ол хайаҕаһынан куоскам көҥүл киирэр-тахсар. Ыалларбытын кытары хайаҕаһынан илии тутуһуохпутун сөп. Муостата, дьиэ үрдэ эмэҕирэн, бытарыйа турар. Аллараа этээскэ уу-хаар, туалет кирэ-хоҕо киирэ турар.

Тойоттор кэлэн көрөн бараллар эрээри, туһа суох. Ол иһин былырыыҥҥа диэри олоро сатаан баран, дьиэ куортамнаһан көһөргө күһэллибиппит. Мин сиэммин, тулаайах кыыһы эппиэкэҕэ ылан, иитэбин. Ол киниэхэ бэриллэр харчынан куортамнаһабыт. Харчыта төһө элбэх буолуой, 11 тыһыынчаҕа хааччыллыыта суох мас дьиэни куортамнаһан олоробут. “Эн харчыгын барыыбыт, дьиэбитигэр төттөрү барыахха”, — диэтэххэ, сиэним буолуммат. Өһүөҕэ баттатан өлүөхпүт диэн куттанар. Кини быйыл оскуоланы бүтэрдэ. Төрүөҕүттэн сүрэх ыарыылаах, аастымалаах, онкологиянан ыалдьар кутталлаах. Бэйэм инбэлииппин. Онон итинник куһаҕан усулуобуйаҕа олорор кыахпыт суох. Бырагыраамаҕа хапсан, киһилии дьиэҕэ олоруохпутун баҕарабыт.

“Саҥа дьиэҕэ баҕарбаппын”

Дьокуускай куорат Дьиэ-уот сыһыаннаһыыларыгар департамена Лариса Дабаеваҕа хас да дьиэни ыларга этии киллэрэ сылдьыбыт. Ол эрээри, кини хара маҥнайгыттан саҥа тутуллар дьиэҕэ ылбаппын, КПД дьиэни баҕарабын диэн эппит эбит.

— Саҥа тутуллар дьиэ хаачыстыбата суох, салгына мөлтөх, үгүс хиимийэлээх, доруобуйабыт туругунан, аастымалаах дьон сатаан олорбоппут. Оттон кинилэр саҥа дьиэни уонна быстах олорорго аналлаах уопсайдары, куорат таһыгар мас дьиэни биэрэ сатаабыттара. Тоҕо биһиги оннукка сөбүлэһиэхтээхпитий? Мин тэрилтэлэри кэрийэртэн, көрдөһөртөн сылайдым, доруобуйам да айгыраата. Эрэйи көрдүм, ыксаатым, кэлэр-барар сирим да суох курдук буолла. Саатар, мин кэннибиттэн сиэним дьиэлэнэн хаалыа этэ, — диир Лариса Ивановна.

Кини Сэргэлээххэ баар ракетнай-байыаннай чааска муоста сууйааччынан 24 сыл үлэлээн, биэнсийэҕэ тахсыбыт. Биэнсийэтэ — 14 тыһ. солк.

Лариса Ивановна ханна үүт-хайаҕас баарынан үҥсүһэ сатаабыт. Холобур, Айсен Николаев мэр эрдэҕинэ, куорат дьаһалтатын дьиэтин ааныгар тутан, кыһалҕатын кэпсээбит. Айсен Сергеевич Дьиэ-уот сыһыаннаһыыларыгар департамен дириэктэригэр сорудах биэрбит да, боппуруос быһаарыллыбатах. Бу кыһалҕа туһунан хаһыаттарга суруллубут, тэлэбиидэнньэ да кэлэн устубут. Салгыы СӨ Киһи быраабыгар боломуочунай Сардаана Гурьеваҕа сылдьыбыт. Соторутааҕыта холодильнига умайбытын истэн, “Бирюса” холодильнигы биэрбит. Киһиэхэ кыра да наада. Лариса Ивановна Сардаана Михайловнаҕа махтанар.

Ону тэҥэ сиэнэ үөрэнэн бүтэрбит 35-с №-дээх оскуолатын кэлэктиибигэр махталын биллэрэр. Дириэктэр, учууталлар кинилэр кыһалҕаларын өйдөөн, туох кыалларынан көмөлөһөллөр эбит.

“Бэйэтэ аккаастаммыта”

Бу кэнниттэн Дьиэ-уот сыһыаннаһыыларын департаменыгар официальнай ыйытык ыыппыппыт. Эппиэтэ бэрт түргэнник кэлбитэ.

“Гражданка Л.И. Дабаева суругун көрөн баран, манныгы иһитиннэрэбин:

Семен Данилов уулуссатын 14/1 №-дээх дьиэтин 14-с кыбартыырата (28,3 кв.м. иэннээх) Дьокуускай куорат Уокуруктааҕы дьаһалтатын 2016 сыл балаҕан ыйын 13 күнүнээҕи 1553 №-дээх дьаһалынан олорорго сөбө суоҕунан билиниллибитэ.

Онно олоҕуран,  Дьокуускай куорат Уокуруктааҕы дьаһалтата Л.И. Дабаеваҕа маннык олорор дьиэлэри биэрэргэ этии киллэрбитэ:

2016 сыл балаҕан ыйын 18 күнүгэр Кузьмин уул., 30-с дьиэ, 2-с куорпус, 4-2-с кыбартыыра (29,9 кв.м. иэннээх);

2016 сыл ахсынньы 30 күнүгэр  Кузьмин уул., 30-с дьиэ, 2-с куорпус, 3-4-с кыбартыыра (29,7 кв.м. иэннээх).

Бу кыбартыыралартан Л.И. Дабаева аккаас­таммыта.

Салгыы, Дьокуускай куорат Уокуруктааҕы дьаһалтатын 2017 сыл тохсунньу 10 күнүнээҕи 14р №-дээх дьаһалынан, үөһээ ааттаммыт дьиэ сокуоҥҥа олоҕурбут бэрээдэгинэн хаарбах (аварийнай) туруктааҕынан билиниллибитэ.

2017 сыл сэтинньитигэр Л.И. Дабаеваҕа Свердлов уулуссатын 2А №-гэр саҥа тутуллубут дьиэҕэ кыбартыыра биэрэргэ этиллибитэ, ону аккаастаммыта.

2017 сыл сэтинньи 17 күнүгэр СӨ Киһи быраабыгар боломуочунай аппараатыгар Л.И. Дабаева кыттыылаах оробуочай мунньах ыытыллыбыта. Ол түмүгүнэн боротокуол оҥоһуллубута, онно гражданка Дабаева толору хааччыллыылаах мас дьиэҕэ кыбартыыра ылар баҕалааҕа суруллубута.

2017 сыл сэтинньи 18 күнүгэр Рыдзинскай уулуссатын  18/3 №-дээх, толору хааччыллыылаах мас дьиэ иккис этээһигэр туспа куукуналаах, биир хостоох кыбартыыраны (31,2 кв.м. иэннээх) биэрэр туһунан этиллибитэ. Бу дьиэ үчүгэй техническэй турук­таах, пандустаах, тас ааҥҥа домофоннаах. Бу дьиэттэн эмиэ аккаастаммыта.

2018 сыл муус устар ыйыгар СӨ Киһи быраабыгар боломуочунайын аппараатын кытары Газовиктар уулуссаларын 19б №-дээх толору хааччыллыы­лаах, таас дьиэҕэ кыбартыыра бэриллибитин эмиэ аккаастаммыта.

Эбии иһитиннэрэбит, Семен Данилов уулуссатын 14-с №-дээх дьиэ­тэ СӨ Архитектураҕа, тутуу комплексыгар министиэристибэтин хаарбах туруктаах дьиэлэр реестрдэригэр (РФ Бырабыыталыстыбатын 2016 сыл тохсунньу 26 күнүнээҕи 80р №-дээх дьаһалын быһыытынан, 2012 сыл тохсунньу 1 күнүн кэнниттэн эрэ хаарбах туруктааҕынан билиниллибитинэн) киирбитэ. РФ Бырабыыталыстыбатын таһымыгар быһаарыныы ылыллыбытын эрэ кэнниттэн, хаарбах туруктаах олорор дьиэ пуондатыттан гражданнары көһөрүү бырагыраамата оҥоһуллуохтаах.

Үөһэ этиллибит дьиэ олохтоохторун көһөрүү боппуруоһа бу былааннанар бырагыраама чэрчитинэн быһаарыллыаҕа. Онон дьиэни көтүрүү уонна олохтоохтору көһөрүү болдьоҕо бу былааннанар бырагыраама усулуобуйатыттан сиэттэрэн, оҥоһуллуоҕа.

Дириэктэр И.В. Ткаченко”.

Түмүккэ

Кырдьаҕас киһи эрэйдэнэрэ хараастыылаах суол. Ону тэҥэ сокуонунан дьиэ ылар бырааптаах буоллаҕа. Иккис өттүнэн ылан көрдөххө, сирэн-талан, хаппырыыстаан талымастаннах­ха, кэнники уочарат тэбиллэн иһэҕин. Ол да буоллар, киһини эрэйдээбэккэ, бу боппуруоска сөптөөх быһаарыы ылыныллара ирдэнэр.

Ангелина ВАСИЛЬЕВА, «Саха сирэ» хаһыат, edersaas.ru

РЕДАКЦИЯТТАН: Лариса Дабаева көмө көрдүүр. Кини куортамнаһан олороругар, аһыгар-таҥаһыгар биэнсийэтин харчыта тиийбэт. Көмөлөһүөн баҕалаах дьон 89841058357 нүөмэринэн киниэхэ эрийэ сылдьыаххытын сөп.

Юридическай өттүттэн хайдаҕый?

Pravoved.ru сайтка сурулларынан, 2018 сыл балаҕан ыйыттан хаарбах дьиэттэн көһөрүү быраабылата кыратык уларыйбыт. Балаҕан ыйыгар диэри хаарбах дьиэҕэ олорооччулар саҥа кыбартыыраҕа босхо киирэр кыахтаах эбит буоллахтарына, билигин ый аайы эбии харчы төлүөхтэрин наада.

Гражданнар ылар кыбартыыралара ханнык оройуоҥҥа баарын бэйэлэрэ талар бырааптаахтар; саҥа дьиэлэрин усулуобуйата  уруккуларыттан кыра, куһаҕан буолуо суохтаах; дьиэ сыанатын араастаһыытын төлүөхтээхтэр.

Өскөтүн төлүүр харчылара суох буоллаҕына, социальнай куортам бырагыраамата үлэлиир. Ол эбэ­тэр хаарбах дьиэттэн көһөрүллүбүт  инбэлииттэр, биэнсийэлээхтэр, элбэх оҕолоохтор уонна кыаммат ыаллар босхо дьиэ ылыахтаахтар. Ону ааһан, маннык категориялаах гражданнар саҥа кыбартыыра оройуонун талар бырааптаахтар. Атын гражданнар, дьиэлэрэ 2018 сылга диэри хаарбах туруктааҕынан билиниллибит буоллаҕына, урукку усулуобуйанан (босхо) көһүөхтээхтэр.

+1
0
+1
0
+1
0
+1
0
+1
0
+1
0
+1
0