Сөтүө кэмэ саҕаланна. Сэрэҕи умнумаҥ!

Ааптар: 
Бөлөххө киир:

 Сөтүө кэмэ саҥа саҕаланна, оттон оҕо ууга былдьаныытын номнуо үс түбэлтэтэ таҕыста. Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ. 

edersaas.ru


Ол курдук, сыччах биир күн — бэс ыйын 16 күнүгэр Таатта улууһун Ытык Күөл сэлиэнньэтигэр күнүс 15.00 чаас саҕана 6 уонна 8 саастаах ини-бии уолаттар ууга былдьаммыттар. Оттон ити күн киэһэтигэр, Дьокуускай куоракка 18.00 чаас саҕана, Сэргэлээхтиир суол оройуонугар баар күөлгэ 17 саастаах уол суорума суолламмыт. Бу оҕо инбэлииттэргэ аналлаах реабилитациялыыр киин иитиллээччитэ эбит.

Бу чахчыларынан силиэстийэ уорганнара бэрэбиэркэ ыыталлар. Ол түмүгэр, процессуальнай быһаарыы тахсыаҕа.

Сотору куйаас күннэр сатыылыахтара, ол аата, ууттан тахсыбакка сөтүөлүүр баҕалаах элбиэ. Ордук оҕо аймах үөрүүтэ үксүө.

Итинэн сибээстээн, сөтүө кэмигэр ураты болҕомтолоох буолуу ирдэнэр.

Ууга түһэн, былаҕайга былдьаммыттар түбэлтэлэрин ырытыы көрдөрбүтүнэн, алдьархай сүрүн төрүөттэринэн сөтүөҕэ анамматах, көҥүллэммэтэх сирдэргэ сөтүөлээһин, арыгы иһэн баран сөтүөлээһин, ууга сылдьыы быраабылаларын кэһии уонна сэрэхтээх буолуу ирдэбиллэрин тутуспат буолуу буолаллар.

Маннык быһылааннар тахсыбаттарын туһугар РФ Ыксаллаах быһыыга-майгыга министиэристибэтин Саха сиринээҕи управлениета маннык сүбэлэри биэрэр:

* Төрөппүттэр, кыра саастаах оҕолоргутун ууга көрүүтэ-истиитэ суох ыытан кэбиһимэҥ, хараххыт далыттан сүтэримэҥ;

* Сөтүөҕэ анамматах, көҥүллэммэтэх сирдэргэ сөтүөлээмэҥ;

* Билбэт уугутугар умсумаҥ;

* Хааччахтаммыт кыраныыссаны бэлиэтиир буйкалар анараа өттүлэригэр барымаҥ;

* Ууга устар көлөлөргө (мотуордаах, баарыстаах, эрдиилээх тыыларга уо.д.а) чугаһаамаҥ;

* Ууга билбэт сиргититтэн, ыстанарга анамматах үрдэллэртэн ыстанымаҥ;

* Итирдэр утахтары иһимэҥ, ууга итирик кииримэҥ;

* Ууга умсууну уонна сөтүөлээччини тутан ылыыны кытта сибээстээх оонньуулары оонньоомоҥ;

* Мэниктээн, ууга түһэн эрэрдии сымыйа түрүлүөнү таһааран хаһыытаамаҥ;

* Ол-бу хаптаһыннарга, бэрэбинэлэргэ, массыына хаамыраларыгар, үрүллүбүт матараастарга сытан устумаҥ;

* Ууну сыыһырдымаҥ, киртитимэҥ;

   Сайыҥҥыт этэҥҥэ аастын!

Вера МАКАРОВА, «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0