Чурапчы улууһун Болтоҥо с. саҥа талыллыбыт баһылыга Варвара Макарова үлэтин, бастатан туран, чөл олоҕу өрө тутууттан саҕалаата. Кинилэргэ Варвара Васильевна ыҥырыытынан Матвей Лыткин салайааччылаах десант ыалдьыттаата.
edersaas.ru
Дьокуускайтан кэлбит исписэлиистэри кытары көрсүһүүгэ улуустааҕы «Чэчир» уопсастыбаннай хамсааһын салайааччыта Г.Е. Николаев, уопсастыбаннай сэбиэт бэрэссэдээтэлэ А.А.Захаров, дьиэ кэргэн уонна оҕо аймах дьыалатын исписэлииһэ Т.П. Бушкова, улуустааҕы балыыһа кылаабынай бырааһын солбуйааччы А.В.Седалищева уо.д.а. кытыннылар.
«Төгүрүк остуолга» олохтоохтору долгутар тирээн турар боппуруостары дьүүллэстилэр. Ону тэҥэ арыгыны иһэн баран буруйу оҥоруу, төрөөһүн уо.д.а. демография боппуруостара сытыытык турдулар.
Нэһилиэк дьокутаата А.В. Петрова, Болтоҥо нэһилиэгин баһылыгын социальнай боппуруостарга солбуйааччы А.А. Ефремов, бэтэрээн учууталлар Х.Д. Михайлова, В.М. Жирков, нэһилиэк уопсастыбанньыга В.И. Монастырева сэлиэнньэҕэ арыгыны атыылааһыны букатын бобор туһунан этии киллэрбиттэрин нэһилиэнньэ өйөөтө. Олохтоохтор өрөспүүбүлүкэ бырабыыталыстыбата чөл олоххо ыытар бэлиитикэтин өйүүллэрин биллэрдилэр, инники үлэлэрин былаанын торумнаатылар, кыһалҕалаах боппуруостары болҕомто киинигэр туруордулар.
Түмүккэ, мэлдьи буоларын курдук, Матвей Иванович хаалыктаах хаамыыга маастар-кылаас ыытта.
Онон, Болтоҥо с. баһылыга Варвара Макарова бэйэтин үлэтин арыгыны атыылааһыны тохтотууттан саҕалаан, өрөспүүбүлүкэҕэ саҥа талыллыбыт баһылыктарга бастыҥ холобуру көрдөрдө.
Надежда ЕГОРОВА, «Саха сирэ» хаһыат, edersaas.ru