Саҥа холбоммут оптоволокно ситимин алдьаттылар

Ааптар: 
Бөлөххө киир:

Ааспыт өрөбүллэргэ Өймөкөөн улууһун киинигэр Уус-Ньараҕа оптоволокно ситимэ холбонор үөрүүлээх тэрээһинэ буолбута.

 Елена ПОТОЦКАЯ, «Саха сирэ» хаһыат, https://edersaas.ru

 Хомойуох иһин, өймөкөөннөр үөрүүлэрэ уһаабата. Нэдиэлэ саҥатыгар Уус-Ньара олохтоохторо: “Интэриниэппит, сибээспит олох да сүттэ”, — диэн айманан, батсаап нөҥүө туох буолбутун сураһан барбыттара. Кимэ биллибэт дьон оптоволокно кабелын 14 сиринэн быспыттара билиннэ. “Колымскай экспресс” диэнинэн аатырар оптоволокно ситимэ Аллараа Бэстээхтэн Өймөкөөн улууһугар диэри икки сыл устата инвестор бэйэтин үбүгэр тардыллыбыта. Сорох учаастактарга кабель аһаҕас сиргэ сытар. Уонтан тахса сыл үлэлиир бэдэрээтчиттэр бэлиэтииллэринэн, маннык балаһыанньа биирдэ да үөскүү илик этэ. Ордук Саарылаахтан Бадарааҥҥа диэри улахан алдьаныы тахсыбыт. Бу иннинэ бу учаастакка кабелы эмиэ анаан быһа сылдьыбыттарын өрөмүөннээбиттэр. Онон бу хаһыс да сырыыларын алдьатыылара эбит. Бүгүн сибээс үлэһиттэрэ чөлүгэр түһэрэр үлэни ыыталлар. Саҥа ситим бырайыагын бастакы түһүмэҕин тутууну Өймөкөөнү кытта ыаллыы сытар Магадаан уобалаһыгар туттарар үөрүүлээх тэрээһин кэнниттэн оптоволокнону салгыы тардыахтаахтар этэ. Онон үлэ ситэ бүтэ илик. “Халыма” федеральнай трассатынан айанныыр үгүс дьон сир үрдүгэр сытар оптоволокно ситимин, кырдьык, соһуйа көрөллөрө. Магадааҥҥа диэри тардыллыахтаах ситими барытын тиһэҕэр тиэрдэн баран, үлэ салгыы ыытыллыахтаах этэ.

Бүгүн Өймөкөөн улууһунан ааһар оптоволокно ситимин кимэ биллибэт дьон алдьатыыларын туһунан “Саха” НКИХ суруналыыстара анал биэрии оҥорон, киэһээҥҥи “Сонуннарга” көрдөрдүлэр.

Оптоволокно кабелыгар киһи туһанара суох. Кабель иһигэр ханнык да өҥнөөх металл суох, өстүөкүлэ эрэ. Онон Саха сирин олохтоохторо маннык кабелы Бэрдьигэстээх да өттүгэр, Өймөкөөн да диэки көрөр буоллахтарына, тыытымыахтарын наада. Өрөспүүбүлүкэ сиригэр-уотугар оптоволокно ситимин олоххо киллэрии өссө хас да сылы быһа барыаҕа. Ол эбэтэр, өссө түөрт кабель тардыллан сиргэ көмүллүөхтээх, — диэн бэлиэтээтэ сибээс уонна информационай технология миниистирэ Александр Борисов.

Оптоволокно кабела “тестовай” бэрэбиэркэ быһыытынан сиргэ тардыллан сытарын үгүс дьон билэр. Ол эрээри кимэ биллибэт дьон соруйан кабель сытар хас да учаастагын быспыттар, балтараа килэмиэтирдээх сиргэ соспуттар. Маннык быһыылана сылдьан, хайдах түргэн сибээһи олоххо киллэриэххэ сөбүй? Онон улуус дьаһалтата бу боппуруоһу кытаанах хонтуруолга ылла, — диэн иһитиннэрдэ “Саха» НКИХ суруналыыстарыгар Өймөкөөн улууһун муниципалитетын баһылыга Михаил Захаров.

Ама да, куһаҕан санааны баҕарбыт да буоллахтарына, туох өйдөөх-санаалаах дьон маннык быһыыланаллара буолуой?

Елена ПОТОЦКАЯ, «Саха сирэ» хаһыат, https://edersaas.ru

Мария Васильева хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0