Мобильнай хампаанньа оператора анал банковскай каарталарынан номнуо атырдьах ыйыттан, Москва, Санкт Петербург, Ярославль, Тверь, Калининград, Мурманскай, Архангельскай уонна Вологда олохтоохторо туһана олороллор. Оттон билигин «Мегафон» абоненнара бары банковскай каартанан туһаныахтарын сөп.
«Мегафон» 76 мөлүйүөн кэриҥэ абоненнаах бөдөҥ хампаанньа. Күн бүгүн 10 мөлүйүөн кэриҥэ киһи саҥа пластиковай каартанан туһанан эрэллэр. «Сүрдээх табыгастаах каарта. Маҕаһыынтан табаар ылан баран, бу каартанан төлөһөҕүн. Суотабай төлөпүөҥҥэр төһө харчылааххыт да, соччо харчы каартаҕа баар», – диэн «Мегафон» Уһук Илиннээҕи салаатын дириэктэрэ Андрей Левыкин кэпсиир.
Ол курдук мобильнай төлөпүөҥҥүт суотугар төһө харчы баар да, каартаҕытыгар оччо харчы баар буолар. Mastercard ситим нөҥүө үлэлиир буолан, ханнык баҕарар маҕаһыыҥҥа, тэрилтэҕэ «Мегафон» каартатынан төлөһүөххэ сөп.
«Все включено» тарыыпка холбоно сылдьар дьон маннык каартаны босхо ылаллар. Анал салоҥҥа тиийэн биэс мүнүүтэ иһигэр оҥотторулларын таһынан, биир нүөмэргэ уон каартаны тэҥинэн холбуохха сөп. Өссө маны ааһан, каартанан хото туһанааччыларга ый ахсын бырыһыан эбиллиэ.
Бу күннэргэ суотабай хампаанньа салона Чурапчы сэлиэнньэтигэр аһыллан, илин эҥэр олохтоохторо эмиэ маннык өҥөнөн туһанар кыахтаннылар.
Анивера АКИМОВА.