Инвестиция сайдыытын уонна предпринимательство миниистирэ Антон Сафронов саҥа дуоһунаска ананан баран, быйыл толорор былаас отчуотугар аан бастаан кыттыыны ылла, тыа сирин урбаанньыттарын кытта көрүстэ.
Елена ПОТОЦКАЯ, «Саха сирэ» хаһыат, edersaas.ru
Таатта улууһугар кини Чөркөөххө, Тыараһаҕа, Даайа Амматыгар сырытта.
Антон Сафронов:
— Олус таһаарыылаахтык үлэлиир урбаанньыттары бэлиэтии көрдүм. Кинилэр үлэлиир усулуобуйаларын үөрэттим. Сүрүннээн, тыа хаһаайыстыбатын эйгэтэ буолан, эти-үүтү переработкалыыр ньымаларын көрдүм-иһиттим. Холобура, Чөркөөххө биир урбаанньыт үүт астан мороженай оҥорорго ылсыбытын сэргээтим. Кээмэйэ кыра эрээри, сотору кэминэн дьоҕус бизнеһин сайыннарар былааннардаах. Отчуот кэнниттэн кини биһиэхэ үлэтин хайысхатынан киирэн билсэ сылдьыаҕа. Урбаанньыттар туруорсуулара үгүс. Судаарыстыба үбүнэн өйөбүлүгэр наадыйаллар.
Улуустааҕы «Бизнес-инкубатор» салайааччыта Петр Максимов миниистиригэр бэйэ дьыалатынан дьарыктанан эрэр урбаанньыттар үлэлиир усулуобуйаларын билиһиннэрдэ, дьоҕус бизнес эйгэтигэр бастакы ситиһиилээх хардыыларын кэпсээтэ. Эдэр дьон өрөспүүбүлүкэҕэ билигин үлэлии турар бырагыраамалары аныгы көрүүлээх гына саҥардарга этии киллэрдилэр. Миниистир бэйэтин үөлээннэхтэрин кытта атах тэпсэн олорон, кинилэри кытта аһаҕастык кэпсэттэ, бэйэтин кэскиллээх былааннарын билиһиннэрдэ.
Кэрэхсэбиллээҕэ, саҥа миниистир бириэмэ булан, суруналыыстары кытта көрүстэ.
— Мин толорор былаас отчуотугар уопуттаах салайааччылары кытта сылдьан, тыа сирин олоҕун-дьаһаҕын илэ харахпынан көрөн, дьон-сэргэ санаатын истэн, инники үлэбэр сорук ылынарбар бэрт үгүс туһалааҕы биллим, — диэн Антон Сафронов отчуот туһунан санаатын үллэһиннэ.
Инвестиция сайдыытын уонна предпринимательство миниистиэристибэтин пресс-сэкирэтээринэн саха, нуучча, английскай тыллары холкутук баһылаабыт, суруналыыстыка эйгэтигэр киэҥник биллэр, уопуттаах суруналыыс Алексей Толстяков ананна. Онон кини отчуот кэмигэр биэдэмистибэтин миниистирин суруналыыстары кытта анаан көрсүһүннэрбитэ, пресс-сэкирэтээр кэллиэгэлэригэр чугаһын бэлиэтэ.
Тыа сирин урбаанньыттарын үлэлиир усулуобуйаларын көрбүт-истибит, санааларын истибит эдэр салайааччы дьоҕус бизнеһи сайыннарыыга туруулаһа сылдьар дьону олохтоохтук өйүөҕэ диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru