Бүгүҥҥүттэн, кулун тутар 13 күнүттэн, Тыа хаһаайыстыбатын уонна ас-үөл бэлиитикэтин министиэристибэтигэр «Саҥа саҕалыыр фермер» куонкуруска кыттар дьонтон докумуоннары тутуу саҕаланна. Итиэннэ кулун тутар 24 күнүгэр диэри салҕанан барыаҕа.
Василий НИКИФОРОВ, «Саха сирэ» хаһыат, https://edersaas.ru
Санатан эттэххэ, бу бырагыраама 2012 сылтан үлэлиэҕиттэн биэс сыл устатыгар 1245 киһи кыттыбытыттан, 552 саҥа саҕалыыр фермер хаһаайыстыбатын хаҥатарыгар 1,5-лыы мөл. солк. суумалаах грант ылбыта, ол эбэтэр федеральнай уонна өрөспүүбүлүкэ бүддьүөттэриттэн 825 мөл. 825 тыһ. солк. кээмэйдээх үп ороскуоттаммыта.
Эрдэ иһитиннэрбиппит курдук, быйылгы куонкуруска кыра уларытыы киирдэ: ынах сүөһүнү иитии хайысхатыгар үлэлээччилэргэ көмө үп кээмэйэ икки бүк улаатыннарыллан, 3 мөл. солкуобай буолла. Онтон уратыларга урукку кээмэйинэн хаалла. Тэрийээччилэр этэллэринэн, быйыл 60-ча «саҥа саҕалыыр» бааһынай көмө үпкэ тиксэрэ сабаҕаланар, өскөтүн ынах сүөһү хайысхатыгар киирсээччи күүтүллүбүтүттэн аҕыйах буоллаҕына, грант ылааччы ахсаана өссө эбиллиэн сөп.
Куонкуруска сааһыттан тутулуга суох, икки сыллааҕыттан бэттэх хаһаайыстыба тэринэн үлэлии сылдьар бааһынайдар кыттар бырааптаахтар. Ону кытта грант сууматын 10 бырыһыаныгар тэҥ кытаран-көҕөрөн көстөр хачыгырас кумааҕылаах буоларыҥ эрэйиллэр. Манна сыһыаран эттэххэ, «Дьиэ кэргэн сүөһү иитэр фермаларын сайыннарыы» куонкуруска докумуоннары тутуу өйүүн, кулун тутар 15 күнүгэр, түмүктэнэр. Онон, Саха сирин эдэр-эмэн бааһынайдарыгар «киһи эбэтэр кии буолар» түбүктээх күннэр түбүлээн тураллар.
Василий НИКИФОРОВ, «Саха сирэ» хаһыат, https://edersaas.ru