Үүммүт сылтан тугу кэтэһэбит
Саҥа дьыл бырааһынньыгар киһи барыта ураты, сонун бэлэҕи кэтэһэр үгэстээх. Ол эрээри саҥа сокуоннар, уларытыылар киирэннэр, бэйэбит да билбэппитинэн олус «сыаналаах» бэлэҕи тутан соһуйабыт. Урукку өттүгэр коммунальнай өҥө тарыыптара тохсунньу 1 күнүттэн үрдүүр эбит буоллахтарына, билигин үрдээһин сылга биирдэ от ыйыттан оҥоһуллар. Онтон бензин, уматык сыаната, биэнсийэ кээмэйэ сыл саҕаланыыта уларыйар.
Путин хамнаһы 300 солкуобайынан үрдэтиэҕэ
Россия үрдүнэн хамнас алын кээмэйэ от ыйын 1 күнүттэн 7800 солк. тэҥнэһиэҕэ. Билигин бу суума 7500 солк. ааҕыллар. Онтон Саха сиригэр хамнас алын кээмэйэ икки төгүл үрдүк. Хамнас алын кээмэйин үрдэтэр туһунан сокуоҥҥа РФ бэрэсидьиэнэ Владимир Путин ахсынньы ортотугар илии баттаабыта.
Уот тарыыба 50% чэпчиэҕэ
Судаарыстыбаннай Думаҕа «О внесении изменений в Федеральный закон «Об электроэнергетике» сокуон бүтэһиктээх ааҕыыны ааһан, Уһук Илин регионугар баар бырамыысылыннай хампаанньаларга уот тарыыба Россия орто көрдөрүүтүгэр тэҥнэһиэҕэ.
Сокуон 2017 сыл тохсунньу 1 күнүттэн олоххо киириэҕэ. Уһук Илиҥҥи региону сайыннарыы миниистирэ Александр Галушка иһитиннэрбитинэн, региоҥҥа уот тарыыба 1 киловатт чааһа 3,34 – 9,2 солк. тэҥнэһэр. Уот тарыыба аһара үрдүк буолан, инвестиционнай бырайыактары олоххо киллэрии уустуктардаах.
Сокуон олоххо киирдэҕинэ электроэнергия тарыыба Чукоткаҕа – 65 %, Саха сиригэр – 50 %, Сахалиҥҥа – 46 %, Магадан уобалаһыгар – 34 % намтыаҕа.
Шампанскай акциһа үрдүөҕэ
Судаарыстыбаннай Дума дьокутааттара үһүс ааҕыыга Нолуок кодексыгар уларытыылары бигэргэттилэр. Кэлэр сылтан арыгы, табаах уонна дизельнэй уматык сыанатыгар уларыйыылар киириэхтэрэ. Ол курдук импортнай сырьенан оҥоһуллубут шампанскай, вино, кыраадыстаах арыгы уонна пиибэ акциһа тохсунньу 1 күнүттэн улаатан, биир лиитирэтэ ортотунан 18 солкуобайынан үрдүөҕэ.
Табахсыттар ороскуоттара элбиэ
2017 – 2018 сылларга табаах акзиһа икки бүк улаатыахтаах. Онон быһа холоон, кэлэр сыга биир хаа сигарета орто сыаната 220 солкуобай буолуон сөп.
Бүгүҥҥү туругунан биир тыһыынча сигарета акциһын ставката 1680 солк. тэҥнэһэр. 2017 сылга 2123 солк. диэри үрдээтэҕинэ, биир паачка сигарета 220 солкуобайга тиийиэҕэ.
2014 сыллаахха Россия киин регионнарыгар «Магнат», «Корона», «Прима», Alliance, LD, Glamour, «Оптимум»курдук сигареталар ортотунан 40 солк., онтон 2015 сыллаахха 48солк. атыыланаллара. Онтон «орто кылааска» киирэр Chesterfield, Next, Rothmans сигареталар 2015 сыллаахха 68 солк., онтон Parliament, Marlboro, Kent – 95 солк. атыыланаллара.
Бензин 8 – 12% үрдүөн сөп
«ЛУКойл» хампаанньа салайааччыта Вагит Алекперов, 2017 сылга Россияҕа бензин сыаната 8 – 12% ;рдүөн сөбүн этэн турар. Бу дизельнэй уматык уонна бензин акциһа үрдээһинин кытары сибээстээх.
Оттон «Сибойл», «Туймаада-ньиэп» хампаанньалар бэрэстэбиитэллэрэ биһиги хаһыаппытыгар иһитиннэрбиттэринэн, тохсунньу 1 күнүттэн сыаналарын үрдэтэр былааннара суох.
1 килэмиэтир – 3,06 солкуобай
Ыарахан уйуктаах массыыналар федеральнай суолунан айанныыллара «ыарыахтаах». Ол курдук тохсунньу 1 күнүттэн «Платон» тарыыба үрдээн, 12 туоннаттан үөһээ ыйааһыннаах массыына айанын сыаната икки төгүл улаатара күүтүллэр. 1 килэмиэтир иһин 3,06 солк. төлүөхтэрэ.
ОСАГО электроннай полиһа баар буолуо
Тохсунньу 1 күнүттэн страховкалыыр хампаанньалар сайт нөҥүө ОСАГО электроннай полистарын атыылыахтара. Маны таһынан суол быраабылатын кэһэр суоппардарга полис сыаната 2,5 төгүл ыарыаҕа.
Суоппардар «пошлиналара» 3000 солк. тэҥнэһиэ
Суоппар дастабырыанньатын оҥотторууга, судаарыстыбаннай полшина кээмэйэ тохсунньу 1 күнүттэн улаатыахтаах. Билигин төлөбүр кээмэйэ 2000 солк. эбит буоллаҕына, аны аҕыйах хонугунан 3000 солк. диэри үрдүө. Оттон массыынаны регистрациялааһын 1500 солк. диэри улаатыахтаах.
Пааспары оҥотторуу кытаатар
Кыраныысса таһыгар тахсар аныгы биометрическэй пааспары оҥотторуу сыаната 1000 солк. үрдүөхтээх. Билигин судаарыстыбаннай пошлина кээмэйэ улахан дьоҥҥо 3500 солк., онтон оҕолорго 1500 солкуобай. Эргэ пааспар сыаната оннунан хаалыа. Улахан дьоҥҥо 2000, оттон оҕолорго 1000 солкуобай.
Анивера АКИМОВА.