Биир ыйынан Дьокуускай олохтоохторо ыраас ууну кыраантан иһэр кыахтанабыт. Ол курдук, балаҕан ыйын 4 күнүгэр, Дьокуускайга саҥа ууну хачайдаан ыраастыыр уонна дьиэлэргэ тиэрдэр улахан тутуу үлэҕэ киириитин үөрүүлээх арыллыыта буолла.
«Саҥа водозабор үлэҕэ киирэн, уу ырааһырбытын олохтоохтор бэйэлэринэн билиэхтэрэ. “Тахал Консалтинг Инжиниирз Лимитед” Израиль хампаанньата саҥа ууну ыраастыыр тутууну туруорда-таҥна. Урут ууну хлорунан ыраастыыр буоллахпытына, билигин киһи доруобуйатыгар буортута суох аныгы ньыманан уу ыраастаныаҕа. Турбалар хаачыстыбалара үчүгэйэ буоллар, ууну кыраантан иһиэххэ сөп этэ. Саас уонна күһүн саһархай өҥнөөх уу кэлэрэ тохтуоҕа. Турбалары саҥардыы үлэтэ билигин бара турар,” — диэтэ Ил Дархан э.т. Айсен Николаев.
Саҥа эбийиэк 243 миэтэрэ уһуннаах, 26 миэтэрэ кэтиттээх, 330 тыһ. кубометр иэннээх ууну хаһаанар кыахтаах. Туспа реагентнай хаһаайыстыба ыскылааттара бааллар. Онно ууну ыраастыыр реагеннары харайаллар. Ону таһынан, чааска 4500 кубометр ууну хачайдыыр кыамталаах носуос ыстаансыйата тутулунна.
“Уу чаас аайы ыраастаныаҕа, сууккаҕа уопсайа 110 тыһ. кубометр уу хачайданан бэриллиэҕэ. Биир ыйынан ыраас уу олохтоохторго тиийиэҕэ. Билигин ууну ыраастыы турабыт. “Водоканал” үлэһиттэрэ бары саҥа водозаборга үлэлииргэ үөрэннилэр”, — диэн кэпсиир “Воронеж-аква” хампаанньа инженер-технолога Эдуард Носов.
Тутууга уопсайа 5 млрд солк. харчы көрүллүбүт.
Водозабор үөрүүлээх арыллыытыгар Арассыыйа тутууга уонна олох-дьаһах, хомунаалынай хаһаайыстыбатын миниистирин солбуйааччы Андрей Чибис кытынна:
-“Нэһилиэнньэни ыраас уунан хааччыйыы дойдубут биир сүрүн соруга буолар. Сэбиэскэй Сойуус саҕана тутуллубут ууну ыраастыыр эбийиэктэр эргэрэннэр, аныгы олох ирдэбилигэр эппиэттээбэттэр. 2019 сылтан, “Ыраас уу” федеральнай бырайыагы үлэлэтэн саҕалыыбыт. Бырайыак чэрчитинэн, Саха сирин олохтоохторо ыраас уунан хааччыллалларыгар үлэлэһиэхпит. Дьокуускайга саҥа водозабор үлэҕэ киириитэ Арассыыйа куораттарыгар холобур буолар”.
Саҥа тутуу Дьокуускай уонна Жатай бөһүөлэгин олохтоохторун санитарнай нуормаҕа толору эппиэттиир ыраас уунан хааччыйыа.
Николай Попов, «Саха сирэ» хаһыат, edersaas.ru