«Саҥа ырыа» тэлэбиисэринэн куонкурус быйыл сөргүтүллэн, саҥа ааттары дьоҥҥо-сэргэҕэ арыйда.
«Саха сирэ» хаһыат, edersaas.ru
100-чэкэҕэ чугаһыыр сайаапка киирбититтэн, дьүүллүүр сүбэ 30 ырыаны талан ылбыта. Икки ый устата тэлэбиисэри көрөөччүлэр «СМС» нөҥүө куоластаан, бастыҥтан бастыҥы таллылар.
Бэҕэһээ Саха тыйаатырын уораҕайыгар түмүктүүр гала-кэнсиэркэ кыайыылаах аата билиннэ. Уон тыһыынчаттан тахса куолаһы хомуйан, Юрий Гольдеров «Булчут санаата» ырыанан кыайда.
«Куонкурус олус үчүгэйдик ааста. Мин ыараханы көстүүм таларбар көрсүбүтүм. Уопсайынан, уруккуттан бу куонкурус саҥа тахсан эрэр ырыаhыттарга «кынат кэтэрдэр». Онон эдэрдэр дьоҥҥо-сэргэҕэ биллээри кыттабыт. Ханнык баҕарар күрэхтэһиигэ кыттар киһи кыайыыга эрэллээх буолар дии саныыбын«, — диир кыайыылаах Юрий Гольдеров.
Оттон «Саҥа ырыа» дириэксийэтин быһаарыытынан бастыҥынан Айыллаана Семенова «Үрдүккэ» ырыата ааттанна.
«Куонкуруска кыттан олус элбэх доҕордоннум. «Саҥа ырыа» тыына наһаа үчүгэй. Салгыы ыллыыбын, «Этигэн Хомуска» кыттаары бэлэмнэнэ сылдьабын«, — диэн кэпсиир Айыллаана.
«Саҥа ырыа» куонкуруһу «Саха» НКИХ уонна СӨ Судаарыстыбаннай эстрада тыйаатыра кыттыһан тэрийдилэр.
Эстрада тыйаатырын дириэктэрэ Алексей Егоров-Өркөн: «Эһиил «Саҥа ырыа» куонкурус буолуоҕа уонна норуоттар икки ардыларынааҕы таһымҥа тахсыаҕа«, — диэн кэскиллээх этиинэн гала-кэнсиэри түмүктээтэ.
“Саҥа ырыа” кэнниттэн кыттааччылар саналаарын видеонан манна көрүҥ.
«Саҥа ырыа» музыкальнай куонкурус айар аҕата Петр Пестряковтуун кэпсэтиибитин манна ааҕыҥ.
Көрөөччүлэр «Саҥа ырыаны» ахтыбыттар.
«Саха сирэ» хаһыат, edersaas.ru