Элбэх кыбартыыралаах саҥа тутуллубут дьиэҕэ олорооччулар, ол эбэтэр 2016 – 2017 сс. тутуллан киирбит буоллаҕына, хапытаалынай усунуос төлөбүрүттэн биэс сыл устата босхолоноллор.
Оттон элбэх кыбартыыралаах дьиэ хапытаалынай өрөмүөн региональнай бырагырааматыгар киирдэ даҕаны, усунуос төлөнөн барыахтаах. Бу туһунан ааспыт нэдиэлэҕэ «Сахамедиаҕа» ыытыллыбыт төгүрүк остуол кэмигэр Элбэх кыбартыыралаах дьиэлэр хапытаалынай өрөмүөннэрин фондатын бырагыраамаларын ырытар салаа начаалынньыга Ю.И.Намылов иһитиннэрдэ.
Санатан эттэххэ, хапытаалынай өрөмүөн усунуоһун кээмэйэ (элбэх кыбартыыралаах дьиэ 1 кв. миэтэрэтигэр) мас дьиэлэргэ – 3 солк. 60 харчы, лифт көрүллүбэтэх таас дьиэлэргэ – 6 солк., лифтээх таас дьиэлэргэ – 8 солк. быһыллан турар. Дьиҥэр, бу көрдөрүү атын эрэгийиэннэри кытары тэҥнээтэххэ, арыый да намыһах. Холобур, Москваҕа 17 солк. төлүүллэр. Ол эрээри кэлэр сылга усунуос кээмэйэ улаатыахтаах. Чопчу төһө буолара биллибэт. Бу туһунан Дьиэ-уот коммунальнай хаһаайыстыбатын уонна энергетика министиэристибэтин дьиэ-уот бэлиитикэтигэр уонна административнай үлэҕэ департаменын салайааччытын солбуйааччы С.В.Давыдов эттэ.
Анивера Акимова, «Саха сирэ» хаһыат, edersaas.ru